Boks boýunça geçirilen Türkmenistanyň birinjiliginde lebabyň topary ikinji orny eýeledi
Türkmenbaşy şäherinde boks boýunça 2007 ― 2008-nji ýylda doglan ýetginjekleriň arasynda Türkmenistanyň birinjiligini gazanmak boýunça ýaryşlar guraldy. Oňa Aşgabatdan we welaýatlardan ýetginjek türgenleriň 200-e golaýy gatnaşdy.
Ýaryşyň netijeleri boýunça birinjilige daşoguzly türgenler mynasyp boldular. Ýaryşyň ikinji baýrakly ornuny Lebabyň topary eýeledi. Welaýat toparynyň bu üstünliginde Türkmenabat şäheriniň 8-nji sport mekdebiniň türgenleriniň mynasyp paýy bar. Ýagny, ýetginjeklerden Sanjar Hamraýew 48, Saýitjan Babajanow 54, Wepa Mahmudow 80, Alibek Jalilow +80 kilogram agram derejelerinde birinji, Öwez Ýazyýew 44 we Artur Babaýew 50 kilogram agram derejelerinde ikinji baýrakly orunlary eýelediler. Türgenler Nusain Mamedow, Alişan Bekow, Nusret Narzyýew, Umit Karlyýew, Wepa Genjiýew, Anwar Ýuldaşow dagylar hem öz agram derejelerinde üçünji orunlara mynasyp boldular.
