Sungata aśyk bagtyÿar ÿaślar
Lebap welaýat ýörite sungat mekdebinde ähli döredijilik toparlary bilen bir hatarda birnäçe ýyldan bäri ″Kirişli saz gurallar″ bölüminiň zehinli mugallymlaryndan we talyplaryndan düzülen kirişli kwarteti döredijilikli we öndümli işleýär. Bu toparyň düzüminde mugallymlar Rahmetjan Huseýinow, Anwar Jumakulyýew, Merdan Çaryýew we ″Kirişli saz gurallar″ bölüminiň 4-nji ýyl talyby Mekan Ilmuradow bar. Kwartetiň ýaňy döredilenine seretmezden özüniň ýerine ýetirýän eserleri we sazandalaryň ezberligi ähli diňleýjileri özüne maýyl etdi. Toparyň meýilnamasynda dünýä belli meşhur kompozitorlar bilen bir hatarda türkmen nusgawy we ýaş kompozitorlarynyň ajaýyp eserleri bar. Olardan G.Gendel ″Passakaliýa″, A.Agajykow kirişli saz gurallar üçin kwartet, B.Azaraşwilli ″Noktýurn″, P.Moriýa ″Tokkata″, A.Pýatsola ″Tango″, A.Pýatsola ″Libertango″, N.Halmämmedow ″Aýgytly ädim″ kinofilminden ″Aýnanyň aýdymy″, P.Çaýkowskiý Wals , F.Şubert ″Awe Mariýa″, R.Nepesow ″Bahar walsy″ ýaly eserleri aýtmak hökmanydyr. Kwartet Lebap welaýatynda geçirilen ″Senetçilik we amaly-haşam sungaty dünýä halklarynyň mirasynda″ atly Halkara festiwalynda, Türkmenabat şäheriniň çeperçilik mekdebinde geçirilen Türkmenistanyň nakgaşlarynyň we suratkeşleriniň sergisinde , şeýle-de welaýat derejesinde geçirilýän dabaraly çäreleriň ählisinde üstünlikli çykyş edip gelýär.
Lebap welaÿat ÿörite sungat mekdebiniñ mugallymy Anwar Jumakulyÿew
