Kross boýunça Lebap welaýatynyň çempionaty geçirildi
Türkmenabat şäheriniň köp ugurly sport toplumynda kross boýunça Lebap welaýatynyň çempionaty geçirildi. Oňa welaýatyň etraplaryndan gelen we Türkmenabat şäheriniň türgenleri gatnaşdylar.
Lebap welaýat sport we ýaşlar syýasaty müdirliginiň guran bäsleşiginde jemi 98 türgen güýç synanyşdy. Oglanlar 3, 8 we 12 kilometr aralyklara, gyzlara 2, 6 we 8 kilometr aralyga ylgadylar. Toparlaýyn netijeler boýunça Dänew etrabynyň türgenleri birinji, Türkmenabat şäheriniň türgenleri ikinji we Saýat etrabynyň türgenleri üçünji orunlary eýelediler. Türgenleriň arasynda türkmenabatly ýeňil atletikaçy Wladimir Nowikow 12 kilometr, dänewli Röwşen Gaýbullaýew we Ruslan Baltaýew degişlilikde 8 we 3 kilometr aralyklary birinji bolup geçdiler. Zenanlaryň arasynda Çärjew etrabyndan Göwher Jumanyýazowa 8 kilometr, Dänew etrabyndan Sabina Kasymjanowa 6 kilometr we Mähri Rozmetowa 2 kilometr aralyklary hemmelerden öň geçdiler.
