Kaka etrabynda gaýtadan işlenen ýüňden Russiýada keçe ädik öndürýärler
Kaka etrabyndaky «Ata melhem» hususy kärhanasynda maldarçylyk bilen meşgullanýan ýerli telekeçilerden alynýan ýüň arassalanylyp, gaýtadan işlenilýär. 2019-njy ýyldan bäri önümçiligi alyp barýan bu kärhanada gury garda geýilýän keçe ädikleriň, gyşky egin-eşikleriň önümçiligi üçin, keçe basmakda ulanylýan saryja we garaköli goýunlaryň ýüňi gaýtadan işlenilýär hem-de gaplanylýar. Bu ýerde ýüňden egrilen ýüplük hem öndürilýär. Ekologiýa taýdan arassalygy, ýokary hilliligi bilen tapawutlanýan önümlere isleg barha artýar. Kärhana tarapyndan öndürilen önümler Russiýa Federasiýasyna, Hindistan we Belarus Respublikalaryna eksport edilýär.