Türkmenabatly futbolçy AFK-nyň Çempionlar ligasynda çykyş eder
Türkmenabatly futbolçy Ruslan Priýew futbol ýoluny «Ahalda» dowam etdirer. Ol «Ahalyň» AFK-nyň Çempionlar ligasyna taýýarlyklaryna goşuldy.
Professional karýerasyna 2019-njy ýylda Aşgabadyň «Köpetdagynda» gadam goýan Ruslan Priýew Lebabyň «Bagtyýarlyk» futbol toparynyň uçurymydyr. Ol ilkinji tälimi Timur Hüseýinowdan aldy.
«Köpetdag» bilen 2019-njy ýylda Türkmenistanyň kubogynyň eýesi bolan goragçy bir ýyldan soň ýene-de bu ýaryşyň finalyna çenli baryp ýetmegi başardy. 2019-njy we 2020-nji ýyllaryň möwsümlerini «Köpetdagda» geçiren Ruslan Priýew 2021-nji ýylda Marynyň «Energetik» futbol toparynyň düzümine goşuldy. Şu ýylyň başynda bolsa ol Türkmenbaşy şäheriniň «Şagadamy» bilen şertnama baglaşdy.
AFK-nyň Çempionlar ligasynda üstünlikli çykyş etmegi meýilleşdirýän «Ahal» futbol toparynyň tälimçiler düzümi goragda türkmenabatly futbolçyny hem görmek islediler. Ol yklym ýaryşynda «Ahalyň» gorag bölüminiň esasy futbolçylarynyň biri bolar.