«Lebaptelekom» baýramçylyk çäresini gurady
Türkmenabat şäherindäki «Goşa çyrag» toý mekanynda «Nowruz geldi ilime» atly baýramçylyk çäresi geçirildi. Ony Türkmenistanyň Kärdeşler arkalaşyklarynyň welaýat birleşmesi «Lebaptelekom» welaýat elektrik aragatnaşyk kärhanasynyň kärdeşler arkalaşygynyň ilkinji guramasy bilen bilelikde guradylar.
Çäräniň dowamynda bahary, Nowruzy we döwletli Diýarymyzdaky bagtyýar ýaşaýşy wasp edýän aýdymlar ýaňlandy. Dabarada çykyş eden aragatnaşykçylar pederlerimizden miras galan bu baýramyň gadyr-gymmatyna aýratyn ünsi çekdiler. Her ýylyň 21-nji martynyň BMG tarapyndan Halkara Nowruz güni diýlip yglan edilmegi bu gadymy baýramyň Ýer ýüzündäki ykrarnamasynyň miwesidir diýlip çykyşlarda aýdyldy.
