Ýollarymyz asuda boslun
Her ýylda geçirilmegi däbe öwrülen ‘’Ýol hereketiniň howpsuzlygy – ömrümiziň rahatlygy’’ atly biraýlyk Berkarar döwletimiziň täze eýýamynyň Galkynyşy döwründe täzeçe many-mazmuna eýe bolýar. ‘’Ýol hereketiniň howpsuzlygy hakynda’’ Türkmenistanyň Kanuny köçe-ýol hereketindäki gatnaşyklary düzgünleşdirýär. 5 bapdan, 34 maddadan ybarat bolan Kanun ýol-ulag hadysalaryň azalmagynda, adamlaryň janynyň saglygynyň we emläginiň goragly bolmagyny gazanmakda uly ähmiýete eýedir.
Agzalan Kanunda ýol hereketine gatnaşyjylaryň hukuklary we borçlary bellenilýär. Kanunyň talaplaryna laýyklykda ýol hereketine gatnaşyjylar tarapyndan öz hukuklaryny durmuşa geçirilmelidigi kepillendirilýär.
Dänew etrabynyň 43-nji orta mekdebinde ‘’Ýol hereketiniň howpsuzlygy – ömrümiziň rahatlygy’’ atly biraýlygyň dabarasy geçirildi. Polisiýanyň ýol gözegçiligi toparynyň işgärleriniň, mekdep okuwçylarynyň gatnaşmagynda geçirilen wagyz-nesihat çäresi ýokary ruhubelentlige beslendi.
Etrabyň polisiýanyň ýol gözegçiligi toparynyň işgärleri okuwçylara ýol belgilerine üns bermelidigi, ýollarda özüňi alyp barmagyň düzgünlerini berjaý etmekligiň möhümdigi barada gürrüň berdiler. Çäräniň dowamynda köçe-ýol hereketiniň düzgünlerine degişli mekdep okuwçylarynyň arasynda bäsleşik geçirildi. Zehinli çagalar ýol hereketi bilen baglanyşykly sowallara jogap bermekde öz ukyp-başarnyklaryny ýüze çykardylar. Bäsleşige işjeň gatnaşan okuwçylara çäräniň guramaçylary tarapyndan köçe-ýol hereketiniň düzgünlerine degişli gollanmalar we ýadygärlik sowgatlary gowşuryldy.
Ýurt Garaşsyzlygymyzyň şanly 31 ýyllyk baýramçylygynyň öňýanynda geçirilen çärede polsiýanyň ýol gözegçiligi gullugynyň işgärleriniň çykyşlary okuwçylaryň ýol hereketiniň howpsuzlygy baradaky bilimleri artdyrmakda, ýol hereketiniň kadalaryny öwretmekde, olaryň köçe-ýol hereketlerine jogapkärli garamaklaryny gazanmaklarynda uly ähmiýete eýe boldy.
Aşyr Halmyradow,
Dänew etrabynyň Garaşsyzlyk şäherçesiniň polisiýa bölümçesiniň polisiýanyň ýol gözegçiligi toparynyň gözegçisi, polisiýanyň kapitany.
