Zenanlar birleşiginiň Merkezi geňeşi Lebapda üç günlük okuw maslahatyny geçirýär
Türkmenistanyň Zenanlar birleşiginiň Merkezi geňeşiniň hem-de zenanlar guramasynyň
welaýat bölüminiň bilelikde guramaklarynda «Ösüşleriň belentliklerine beslenen täze döwrüň buýsançly zenanlary» atly okuw maslahaty badalga aldy. Bu çäre Lebap welaýatynda üç günläp dowam eder.
17-nji martda irden welaýat Taryhy we ülkäni öwreniş muzeýinde etrapdyr şäherleriň ilkinji
zenanlar guramalarynyň başlyklarynyň we işjeň agzalarynyň, kümüş saçly eneleriň, talyp
gyzlaryň gatnaşmaklarynda okuw maslahatynyň açylyşy boldy. Okuw maslahatynyň barşynda ýurtda gazanylýan beýik ösüşler, ýurdumyzda zenanlara goýulýan belent hormat-sarpa, gelin-gyzlarymyzyň bedew batly ösüş-özgertmelere goşýan önjeýli goşandy dogrusynda giňişleýin gürrüň edildi.
Günüň ikinji ýarymynda Saýat etrabynyň Sakar şäher medeniýet öýünde okuw maslahaty öz
işini dowam etdirdi. Oňa Saýat we Halaç etraplarynyň ilkinji zenanlar guramalarynyň başlyklary we işjeň agzalary, mährem eneler, dürli pudaklarda zähmet çekýän gelin-gyzlar gatnaşdylar. Çäre mahalynda maşgala mukaddesligi, perzent terbiýesi, zenan edebi dogrusynda giňişleýin gürrüň edildi.
