«Ýylyň zenany» bäsleşiginiň Lebap welaýat tapgyry geçirildi
Türkmenabat şäherindäki «Türkmeniň ak öýi» binasynda Türkmenistanyň Zenanlar birleşmesiniň Merkezi Geňeşi tarpyndan ýurdumyzyň zenanlarynyň arasynda yglan edilen «Ýylyň zenany» bäsleşiginiň Lebap welaýat tapgyry geçirildi. Oňa halk hojalygynyň dürli pudaklarynda zähmet çekýän öňdebaryjy zenanlar gatnaşdylar.
Däbe öwrülen bäsleşik ýedi: «Ýylyň işewür zenany», «Ýylyň çeper elli zenany», «Ýylyň sungatda işjeň zenany», «Ýylyň mährem zenany», «Ýylyň öňdebaryjy oba zenany», «Ýylyň telekeçi zenany»,«Ýylyň harby zenany» diýen ugurlary içine alýar.
Bäsleşigiň netijeleri boýunça Saýat etrabyndaky 22-nji orta mekdebiniň mugallymy Jeren Bazarowa «Ýylyň işewür zenany», Farap etrabyndaky 6-njy çagalar bagynyň terbiýeçisi Altyn Muhammedowa «Ýylyň çeper elli zenany», Hojambaz etrabyndaky Burdalyk oba medeniýet öýüniň sazandasy Maýsa Saparowa «Ýylyň sungatda işjeň zenany», Kerki etrabyndaky 9-njy orta mekdebiniň başlangyç synp mugallymy Gyrmyzy Jumaýewa «Ýylyň mährem zenany», №-nji harby bölümiň Komendant rotasynyň serkerdesiniň terbiýeçilik işleri boýunça orunbasary, uly leýtenant Gülüstan Şerapowa «Ýylyň watançy zenany», Halaç etrabyndaky Akgala daýhan birleşiginiň kärendeçisi Maral Gurbanowa «Ýylyň öňdebaryjy oba zenany», Türkmenabat şäherindäki «Bek» hususy kärhanasynyň konditer önümleriniň hünärmeni Firuza Demirowa «Ýylyň telekeçi zenany» diýen atlara mynasyp boldular.
Olar bu bäsleşigiň döwlet tapgyryna gatnaşmaga hukuk gazandylar.
Bäsleşigiň ýeňijilerine Türkmenistanyň Kärdeşler arkalaşyklarynyň welaýat birleşmesiniň gymmat bahaly sowgatlary gowşuryldy.
