JEMGYÝET

«Ýylyň terbiýeçisi―2022» atly bäsleşigiň welaýat tapgyrynyň ýeňijileri mälim boldy

Türkmenabat şäherindäki 65-nji çagalar bagynda «Ýylyň terbiýeçisi―2022» atly bäsleşigiň welaýat tapgyry geçirildi. Lebap welaýat baş bilim müdirliginiň we Türkmenistanyň Kärdeşler arkalaşyklarynyň welaýat birleşmesiniň bilelikde guramaklarynda geçiren çäresine bäsleşigiň etrap, şäher tapgyrlarynda ýeňiji bolan terbiýeçileriň 11-si gatnaşdy.

Bäsleşigiň şertine görä, terbiýeçiler görelde sapaklaryny, okuw-görkezme esbaplarynyň dürli görnüşlerini görkezdiler. Olar öz ugurlary boýunça okuw maksatnamasyna laýyklykda taýýarlan usuly gollanmalaryny, ylmy maslahatlarda, metbugatda eden çykyşlaryny eminler toparynyň garamagyna hödürlediler.

Netijede Türkmenabat şäherindäki 23-nji «Melhem» çagalar bagynyň terbiýeçisi Mahym Hojjyýewa baş baýraga mynasyp boldy. Kerki etrabyndaky 24-nji «Bagtyýarlyk» çagalar bagynyň terbiýeçisi Aknabat Hojaýewa birinji orny eýeledi. Ikinji orna Döwletli etrabyndaky 14-nji «Nesil» çagalar bagynyň tebriýeçisi Gurbangül Mansurowa mynasyp boldy. Darganata etrabyndaky 6-njy «Şatlyk» çagalar bagynyň terbiýeçisi Durjemal Ýazmyradowa üçünji orny eýeledi.

Ýeňijilere Türkmenistanyň Kärdeşler arkalaşyklarynyň welaýat birleşmesiniň gymmat bahaly sowgatlary gowşuryldy.

Bäsleşigiň çäklerinde terbiýeçileriň okuw-görkezme esbaplarynyň sergisi hem guraldy.

Понравилась статья? Поделиться с друзьями: