Ýol hereketiniň howpsuzlygy ― eşretli durmuşyň kepili
Ata Watanymyzda ýol-hereketiniň howpsuzlygyny üpjün etmek wezipesi hormatly Prezidentimiziň baştutanlygynda döwlet syýasatynyň ileri tutulýan ugurlarynyň birine öwrüldi. Berkarar döwletiň täze eýýamynyň Galkynyşy döwründe ýurdumyzda dünýä ülňülerine gabat gelýän ýollaryň çar ýana uzamagy ýollarymyzyň asuda bolmagyna özüniň uly täsirini ýetirýär. Döwlet Baştutanymyzyň halkymyz barada edýän bimöçber aladalarynyň netijesinde döwletimizde ýük hem-de ýeňil awtoulaglaryň sany barha köpeldi. Eziz Diýarymyzda täze ýollaryň gurulmagy, öňden bar bolanlarynyň durkunyň täzelenmegi ata Watanymyzyň görküne görk goşýar. Halkymyza ajap döwri peşgeş beren döwlet Baştutanymyzyň beýik başlangyçlarynyň netijesinde ýurdumyzda her ýylyň sentýabr aýynda «Ýol hereketiniň howpsuzlygy — ömrümiziň rahatlygy» diýen at bilen biraýlyk guramaçylykly ýagdaýda bellenilip geçilýär. Onuň netijesinde ýurdumyzda ýol-ulag hadysalarynyň ep-esli peselýändigini buýsançly nygtamak gerek.
Bagtyýar halkymyzyň ýaşaýyş-durmuş şertleriniň ýokarlanmagy bilen, şahsy hojalyklarda ulanylýan awtoulaglaryň hem sany artýar. Şonuň üçin sürüjiler-de, pyýadalar-da ýol hereketiniň düzgünlerini doly we dogry bilmelidirler. Köçelerde, ýollarda awtoulaglaryň sanynyň köpelmegi, ulag gatnawynyň artmagy olaryň has-da ünsli bolmagyny talap edýär. Bularyň hemmesi bolsa ýol-ulag hadysalarynyň öňüni almakda, ýol hereketiniň howpsuzlygyny üpjün etmekde uly ähmiýete eýedir. Sürüji bolmak, pyýada ýolagçy bolmak — bularyň ikisem örän jogapkärli işdir. Ýoldaky howpsuzlyk ýolagçylaryň we sürüjileriň edýän umumy tagallalaryna baglydyr. Şunuň bilen baglylykda, biziň ýokary okuw mekdebimizde hem birnäçe çäreler, wagyz-nesihat maslahatlary geçirilýär. Ýylyň dowamynda geçirilýän bu çäreler edara-kärhanalarda zähmet çekýän bagtyýar raýatlarymyzyň, mekdeplere, çagalar baglaryna gatnaýan ýaş nesillerimiziň ýol hereketi baradaky düşünjeleriniň has-da kämilleşmegine özüniň uly täsirini ýetirýär. Ýollarymyzyň asuda, abadan, parahat bolmagy üçin bimöçber alada edýän hormatly Prezidentimiziň jany sag, belent başy aman bolsun, tutýan il-ýurt bähbitli tutumly işleri elmydama rowaçlyklara beslensin!
Öwezmyrat JUMAÝEW,
Köýtendag etrap polisiýa bölüminiň Magdanly şäher polisiýa bölümçesiniň
polisiýanyň ýol gözegçiligi toparynyň ýolbaşçysy, polisiýanyň maýory.
