Häzirki zaman dünýäsinde islendik döwletiň kuwwaty we halkyň bagtyýar durmuşy hut ylym we bilim ulgamynyň derejesi bilen ölçelýär. Gahryman Arkadagymyzyň nygtaýşy ýaly, ylym — bu jemgyýetiň hereketlendiriji güýjüdir, bilim bolsa şol güýjüň amala aşyrylmagyny üpjün edýän binadyr. Berkarar döwletiň täze eýýamynyň Galkynyşy döwründe biziň ýurdumyzda ylmyň we bilimiň bitewüligini üpjün etmek, ýaşlary gözlegçilik işlerine çekmek döwlet ähmiýetli wezipä öwrüldi.
Ylym we bilim biri-birinden aýrylyp bilmeýän iki sany uly hazynadyr. Bilim — bu öňden bar bolan tejribeleri we maglumatlary özleşdirmek bolsa, ylym — täze açyşlaryň, döwrebap çözgütleriň we innowasiýalaryň gözlegidir. Ýurdumyzyň ýokary okuw mekdeplerinde, hususan-da Halkara senagatçylar we telekeçiler uniwersitetinde talyplaryň diňe bir nazary bilim almagy bilen çäklenmän, eýsem ylmy-barlag işleri bilen meşgullanmaklary üçin hem ähli şertler döredilendir. Bu bolsa geljekde öz ugrunyň kämil hünärmeni boljak ýaşlaryň täzeçe pikirlenmegine ýol açýar.
Häzirki wagtda ylmyň gazananlaryny önümçilige ornaşdyrmak esasy ugurlaryň biridir. Bilim ojaklarynda kemala gelýän ýaş alymlaryň teklipleri senagatda, oba hojalygynda we IT pudagynda uly netijeleri berýär. Ylymly nesil diňe bir taýýar tehnologiýalary ulanman, eýsem öz milli programma üpjünçiligini, täze tehniki gurallary we ykdysady modelleri işläp düzmäge ukyplydyr. Şeýlelikde, bilim ulgamy ylmyň binýady bolup hyzmat edýär, ylym bolsa bilimiň mazmunyny täzelemäge ýardam berýär.
Ýurdumyzda her ýylyň 12-nji iýunynda Ylymlar gününiň dabaraly bellenilmegi hem bu ugra berilýän uly ünsüň subutnamasydyr. Ylym we bilim bilen ýaraglanylan ýaşlar döwletimiziň geljegini guranlarynda has anyk we düýpli ädimler ädip bilerler. Akylly tehnologiýalaryň, emeli intellektiň we sanly çözgütleriň öňe çykan zamanasynda ylymly bolmak — her bir raýat üçin iň uly baýlykdyr.
Biz — talyp ýaşlar, döwletimiziň bize bolan ynamyny ödemek üçin ylmyň çuňluklaryna aralaşmalydyrys. Sebäbi diňe ylym we bilim arkaly biz Arkadagly Serdarymyzyň we Gahryman Arkadagymyzyň öňümizde goýan belent maksatlaryna ýetip bileris.
ARSLANOWA Sähra,
Halkara senagatçylar we telekeçiler uniwersitetiniň
dil öwreniş bölüminiň 107-nji okuw toparynyň talyby.
