Ykdysady ösüşiň möhüm ugry
Ýurdumyzyň ähli pudaklaryna we ulgamlaryna dünýä ylmynyň soňky gazananlarynyň yzygiderli ornaşdyrylmagy täzeçe pikirlenmegi başarýan, ýurdumyzyň halk hojalygyna sanly ykdysadyýeti ornaşdyrmakda giň mümkinçiligi bolan programma üpjünçiliklerini işläp düzýän, innowasion oýlap tapyşlar bilen meşgullanýan başarnykly ýaş hünärmenleriň ýüze çykmagyna getirýär. Bu ugurda birnäçe ugurlary we maksatlary öz içine alýan «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy», şeýle hem «Türkmenistanda sanly ykdysadyýeti ösdürmegiň 2021 — 2025-nji ýyllar üçin Döwlet maksatnamasy» hem-de ony amala aşyrmak boýunça ýerine ýetirilmeli çäreleriň Meýilnamasy esasynda ykdysadyýetimiziň sanlylaşdyrylmagyna we onuň pudaklaryna maglumat-aragatnaşyk tehnologiýalarynyň ornaşdyrylmagyna möhüm ähmiýet berilýär.
Aýratyn bellemeli tarapy bolsa, ýurdumyzda sanly resminamalar dolanyşygyny ýola goýmak we bir sanly ulgama birikmek arkaly hyzmatlar ulgamy has-da kämilleşýär. Bu bolsa ýurdumyzyň dünýä hojalygyndaky ornyny pugtalandyrmak bilen birlikde milli ykdysady ösüşi gazanmak ugrundaky işleri ep-esli ilerledýär. Şol sanda degişli kanunçylyk namalary esasynda internet web-saýtlaryň döredilmegi we işe girizilmegi durnukly ösüşiň ileri tutulýan wezipeleri üstünlikli ýerine ýetirilýär. Şeýle hem işewürligi we hyzmatdaşlygy giňeltmäge, hyzmatlaryň täze hilini üpjün etmäge, täzeçe usullardan peýdalanmaga we bu ugurda ýaşlaryň iş bilen üpjünçiligini ýokarlandyrmaga, olaryň iş öndürijiligini artdyrmaga şert döredýär.
Gülbahar Aşyrowa,
Türkmenistanyň Oguzhan adyndaky Inžener-tehnologiýalar uniwersitetiniň Biotehnologiýa we ekologiýa fakultetiniň mikrobiologiýa hünäriniň talyby.
