Ýaponiýada türkmen okuwçylarynyň çeken suratlary görkezildi

31-nji ýanwarda Tokiodaky Milli sungat merkezinde mekdep okuwçylarynyň çeken suratlaryndan ybarat bolan «Serhetsiz sungat» atly sergä gatnaşyjylara minnetdarlyk şahadatnamalaryny gowşuryş dabarasy geçirildi.
Sergi 22-nji ýanwar — 1-nji fewral aralygynda dowam etdi we ol «Ýaponiýa-Ýewraziýa» jemgyýeti hem-de «SUMI» Halkara assosiasiýasy tarapyndan bilelikde guraldy.
Bu sergä Türkmenistanyň zehinli okuwçylarynyň 26-sy gatnaşdy. Olaryň çeken suratlary Türkmenistana bagyşlanan aýratyn diwarlykda görkezildi.
Jemleýji dabara Ýaponiýada akkreditirlenen daşary ýurt ilçihanalarynyň wekilleri, «Ýaponiýa-Ýewraziýa» jemgyýetiniň, «SUMI» Halkara assosiasiýasynyň ýolbaşçylary, meşhur suratkeşler we sergä gelen myhmanlar gatnaşdylar.
Ýaponiýanyň Türkmenistandaky ilçihanasynyň saýtynda habar berlişine görä, sergä gatnaşan ähli mekdep okuwçylaryna minnetdarlyk şahadatnamalary gowşuryldy.