«Ýaňlan, Diýarym!» bäsleşiginiň Lebap welaýat tapgyry geçirildi
Geçen hepdäniň şenbe güni Türkmenabat şäheriniň görküne görk goşup oturan «Türkmeniň ak öýi» binasynyň öňündäki meýdança toý lybasyna beslendi. Bu ýerde Türkmenistanyň Prezidentiniň yglan eden «Türkmeniň Altyn asyry» atly bäsleşiginiň çäklerinde geçirilýän «Ýaňlan, Diýarym!» telebäsleşiginiň welaýat tapgyry geçirildi. Oňa höwesjeň aýdymçy ýaşlaryň 11-si gatnaşdy.
Bäsleşige gatnaşyjylaryň her bir çykyşy aýdym-saz muşdaklarynyň gyzgyn el çarpyşmalaryna mynasyp boldy. Eminler topary bolsa ýaş estradaçylaryň çykyşlaryna adalatly baha berdi. Netijede Halaç etrabyndan ýaş aýdymçy Saparmyrat Tekäýew we Türkmenistanyň Döwlet çeperçilik akademiýasynyň talyby Serdar Jumaýew «Ýaňlan, Diýarym!» telebäsleşiginiň welaýat tapgyrynyň ýeňijileri diýlip yglan edildi. Olar bäsleşigiň jemleýji tapgyryna gatnaşmaga hukuk gazandylar.
Telebäsleşige gatnaşyjylaryň ählisine gymmat bahaly sowgatlar gowşuryldy.
