Welaýat bäsleşigi geçirildi
Arkadagly Serdarymyzyň baştutanlygynda ″Arkadag Serdarly Bagtyýar ýaşlar″ ýylynda ýaş nesliň döwrebap, kämil, köptaraplaýyn bilim almak ugrunda uly tagallalar edilýär. Ynha bu gün hem Lebap welaýatyň Çagalar sazçylyk we sungat mekdepleriniň arasynda ýylyň-ýylyna geçirilýän döredijilik bäsleşiklerine badalga berildi. Her ýyl däp bolup gelýän bäsleşikleriň şu ýylky tapgyryny açmak sungat mekdeplerinde hereket edýän skripkaçylar ansambllarynyň paýyna düşdi. Bu dabara Lebap welaýat çagalar sungat mekdebiniň konsertler zalynda geçirilip, welaýatymyzyň ähli künjeklerinden ençeme toparlary bu ýere ýygnady. Olar öz sungatyny ýokary derejede görkezmegiň hötdesinden geldiler. Bäsleşige welaýatymyzyň Türkmenabat şäherindäki, Saýat etrabynyň Sakar şäherindäki, Saýat etrabynyň Garabekewül şäherindäki, Çärjew etrabynyň, Çärjew etrabynyň Farap şäherindäki, Dänew etrabynyň, Dänew etrabynyň Garaşsyzlyk şäherindäki, Köýtendag etrabynyň, Köýtendag etrabynyň Magdanly şäherindäki çagalar sazçylyk we sungat mekdepleriniň ansambllary gatnaşdy. Lebap welaýat medeniýet müdirliginiň düzen düzgünnamasy boýunça bäsleşikde toparlar üç sany saz eserlerini emin agzalaryň öňünde ýerine ýetirmelidiler.Ýagny: akkompanementli (sazandar bilen bilelikde) türkmen kompozitorynyň, soňra daşary ýurt kompozitorynyň wirtuoz häsiýetli we topar ýolbaşçynyň islegine görä akkompanementsiz. Çagalar skripkaçylar toparlarynyň ýerine ýetiren sazlarynyň meýilnamalary hem özüniň köpdürliligi, çylşyrymlylygy bilen haýran galdyrýar. Bäsleşigiň ýeňijileri bolan welaýat çagalar sungat mekdebiniň ″Bagtyýarlyk″ ansamblynyň (ýolbaşçysy mugallym Sardarýan S.A.) ýerine ýetirmeginde beýik türkmen kompozitory N. Halmämmedowyň ″Türkmenistan″ simfoniýasynyň üçünji bölümi, A.Agajykowyň ″Türkmen tango″, M.Makkleanyň ″Çardaş″ şeýle-de Türkmenabat şäheriniň 2-nji çagalar sungat mekdebiniň skripkaçylar toparynyň(ýolbaşçysy Jorakulowa G.) meýilnamasynda Ž.Bizeniň-R.Şedrinyň ″Karmen-sýuita″ transkripsiýasyndan ″Habanera″, Ýe.Derbenkonyň Skerso, A.Agajykowyň ″Galkynyş″ atly ajaýyp eserleri ýaňlandy. Köýtendag etrabynyň çagalar sungat mekdebiniň toparynyň (ýolbaşçysy mugallym Joraýew S.) ussatlyk bilen ýerine ýetirmeginde rus sazynyň nusgawy kompozitorlarynyň biri bolan P.Çaýkowskiniň ″Ukudaky gözel″ atly baletinden Wals, zehinli türkmen kompozitory A.Agajykowyň Kirişli kwartetiniň 4-nji bölümi we görnükli italýan kompozitory A.Wiwaldiniň ″Ýylyň pasyllary″ toplumyndan ″Tomus″ bölümi ýaňlanyp, bäsleşigiň ikinji ornuna mynasyp boldy. Saýat etrabynyň Sakar şäherindäki çagalar sungat mekdebiniň topary (ýolbaşçysy K.Allaberdiýew) Ýe.Derbenkonyň ″Ekspromt″, N.Halmämmedowyň ″Geler″ atly romansynyň topar üçin işlenen görnüşini şeýle-de argentinaly kompozitor H.Rodrigesiň meşhur ″Kumparsita″ ýaly ajaýyp eserleri ýerine ýetirip, bäsleşigiň üçünji ornuna eýe boldular. Ähli ýeňijilere geljekde-de sungat äleminde uly üstünlikleri arzuw edýäris.
Lebap welaÿat çagalar sungat mekdebiniñ mugallymy Leÿla Waliÿewa