Berkarar döwletiň täze eýýamynyň Galkynyşy döwründe hormatly Prezidentimiz, ýurdumyzyň Ýaragly Güýçleriniň Belent Serkerdebaşysy Serdar Berdimuhamedowyň parasatly baştutanlygynda Watanymyzyň mukaddes serhetleriniň goragyny pugtalandyrmak, jemgyýetimiziň asudalygyny, halkymyzyň abadan durmuşyny üpjün etmek boýunça uly işler alnyp barylýar. Bu möhüm wezipeleriň üstünlikli durmuşa geçirilmeginde ýurdumyzyň hukuk goraýjy we harby edaralarynyň, şol sanda gümrük gullugynyň harby gullukçylarynyň hem mynasyp paýy bardyr.
Gümrük gullugy diňe bir harytlaryň we ulag serişdeleriniň gümrük gözegçiliginden geçirilmegini üpjün edýän edara bolmak bilen çäklenmeýär. Ol ýurdumyzyň ykdysady howpsuzlygynyň berk goragynda duran, döwletimiziň kanunlarynyň ýerine ýetirilmegine gözegçilik edýän, bikanun hereketleriň öňüni almakda möhüm orun eýeleýän jogapkärli gullukdyr. Şonuň üçin hem gümrük gullugynyň her bir harby gullukçysy öz işine ýokary watançylyk ruhunda, düzgün-nyzamlylyk, hüşgärlik we jogapkärçilik bilen çemeleşmelidir.
Lebap welaýat gümrükhanasynyň harby gullukçylary hem gündelik gulluk borçlaryny ýerine ýetirmek bilen, ýurdumyzyň ykdysady bähbitleriniň goralmagyna, serhetden geçýän harytlaryň kanunalaýyk dolanyşygynyň üpjün edilmegine, gümrük düzgünleriniň berjaý edilmegine mynasyp goşant goşýarlar. Welaýatymyzyň çägindäki gümrük nokatlarynda alnyp barylýan işler diňe bir häzirki döwrüň talaplaryna laýyk bolman, eýsem, döwrebap tehnologiýalaryň mümkinçiliklerinden netijeli peýdalanmak arkaly has-da kämilleşdirilýär.
Gümrük gullugynyň harby gullukçysy üçin iň esasy häsiýetleriň biri hüşgärlikdir. Sebäbi biziň gullugymyzda her bir resminama, her bir ýük, her bir ulag serişdesi ünsli barlagy talap edýär. Hüşgärlik bilen birlikde, kanunlary kämil bilmek, özüňi alyp barmagyň medeniýetine eýermek, raýatlar bilen edepli gatnaşyk saklamak hem gullugyň aýrylmaz bölegidir. Gümrük gözegçiligi geçirilende talabalaýyklyk, adalatlylyk we ynsanperwerlik ýörelgeleriniň berjaý edilmegi biziň baş borjumyzdyr.
Hormatly Prezidentimiz hukuk goraýjy we harby edaralaryň şahsy düzüminiň öňünde hemişe anyk we möhüm wezipeleri goýýar. Şol wezipeleriň düýp mazmuny Watanymyzyň parahatçylygyny, halkymyzyň asuda durmuşyny, döwletimiziň ykdysady kuwwatyny goramakdan ybaratdyr. Munuň özi biziň her birimizi has-da yhlasly işlemäge, gulluk borjumyzy päk ýürekden ýerine ýetirmäge ruhlandyrýar.
Gümrük gullugynda ýaş harby gullukçylaryň hünär taýýarlygyny ýokarlandyrmak, olaryň kanunçylyk bilimlerini berkitmek, watansöýüjilik ruhunda terbiýelenmegini gazanmak boýunça hem yzygiderli işler alnyp barylýar. Tejribeli işgärleriň ýaşlara görelde bolmagy, gulluk düzgünleriniň berk berjaý edilmegi, hünär ussatlygynyň artdyrylmagy gümrük edaralarynyň işiniň netijeliligini ýokarlandyrýar. Sebäbi güýçli döwlet üçin diňe döwrebap enjamlar däl, eýsem, bilimli, hüşgär, ynamdar we watansöýüji harby gullukçylar hem zerurdyr.
Lebap welaýat gümrükhanasynyň harby gullukçylary Watana wepalylygyň, gulluk borjuna ygrarlylygyň, kanunlaryň goragynda durmagyň belent mekdebini geçýärler. Her bir gulluk güni bize döwletimiziň ynamyna mynasyp bolmagyň nähili uly jogapkärçilikdigini ýatladýar. Biz bu ynamy mukaddes borç hökmünde kabul edýäris.
Ýurdumyzda döredilýän giň mümkinçilikler, harby gullukçylaryň gulluk we ýaşaýyş şertlerini gowulandyrmak ugrunda edilýän aladalar biziň ruhumyzy belende göterýär. Şeýle aladalara jogap edip, biz mundan beýläk-de gulluk borjumyzy halal, ak ýürekden, ýokary jogapkärçilik bilen ýerine ýetirmäge, Watanymyzyň ykdysady howpsuzlygynyň goragynda berk durmaga çalyşarys.
Goý, hormatly Prezidentimiziň parasatly baştutanlygynda eziz Watanymyz Türkmenistan hemişe parahatçylygyň, abadançylygyň we ösüşiň ýoly bilen öňe gitse, halkymyzyň bagtyýar durmuşy has-da rowaçlansyn!
Işanberdi ÇARYMYRADOW,
Lebap welaýat gümrükhanasynyň harby gullukçysy, uly leýtenant.
