Türkmenistanyň Milli Geňeşiniň Halk Maslahatynda seredilen meseleler ara alnyp maslahatlaşyldy
Lebap welaýat Baş maliýe we ykdysadyýet müdirliginiň mejlisler zalynda Türkmenistanyň Milli Geňeşiniň Halk Maslahatynyň geçirilen mejlisine bagyşlanan maslahat geçirildi. Türkmenistanyň Kärdeşler arkalaşyklarynyň Lebap welaýat birleşmesiniň guramagynda geçirilen bu maslahata ilkinji guramalarynyň başlyklary we agzalary, Türkmenabadyň Agrosenagat orta hünär okuw mekdebiniň talyplary gatnaşdylar.
Maslahatyň dowamynda Halk Maslahatynyň 23-nji noýabrda geçirilen mejlisinde garalan meseleler boýunça çykyşlar diňlenildi. Çykyş edenler Türkmenistanyň Milli Geňeşiniň Halk Maslahatynyň Başlygynyň döwlet durmuşy bilen bagly ünsi çeken meseleleriniň halkyň abadan durmuşyny üpjün etmäge, ýurduň ykdysady kuwwatyny ýokarlandyrmaga, döwlet býujetiniň girdeji bölegini artdyrmaga mümkinçilik berýändigini aýratyn nygtadylar.
