Türkmenistanyň küşt boýunça ýokary ligasynyň açyk toparynda lebaply türgen kümüş medala mynasyp boldy

Türkmenistanyň küşt boýunça ýokary ligasynyň açyk toparynda Lebap welaýatyndan bolan türgen Wepaly Halynyýazow ýaryşyň jemleri boýunça kümüş medal gazandy. Chess-results platformasynda çap edilen jemleýji maglumatlara görä, 14 turdan soň Wepaly Halynyýazow 9,5 utuk bilen 2-nji orny eýeledi; çempionlyk bolsa Amanmuhammet Hommadowa (11 utuk) nesip etdi, bürünç medaly Şahruh Turaýew (8,5 utuk) aldy.
Lebaply türgeniň bu üstünligi welaýat sport jemgyýetçiliginde uly ruhubelentlik döretdi. Wepaly Halynyýazow Lebap welaýatynyň wekili bolmak bilen birlikde, häzirki wagtda Türkmen döwlet binagärlik-gurluşyk institutynda talyp bolup bilim alýar we ýokary ligada tutanýerli çykyş edip, medal münberine çykmagy başardy.
Şeýle-de açyk toparyň ýaryşynyň jemlerinde Lebap welaýatyndan çykyş eden, emma baýrakly orunlara düşmedik beýleki küştçüler hem bellärliklidir: Ilhan Çaryýew 8,5 utuk bilen 4-nji orny, Gurbanmyrat Rüstemow bolsa 4 utuk bilen 6-njy orny eýeledi. Mundan başga-da, açyk topara gatnaşan ýeke-täk zenan türgen hökmünde görkezilen Leýla Şöhradowa 3,5 utuk bilen 8-nji orunda ýerleşdi; ol Dänew etrabyndaky 31-nji orta mekdebiň uçurymy bolup, häzirki wagtda Ýagşygeldi Kakaýew adyndaky Halkara nebit we gaz uniwersitetinde talypdyr.