Türkmenistanda pasport bilen bagly düzgün bozmalary üçin jerimeler artdyryldy

Türkmenistanda Administratiw hukuk bozulmalary baradaky Kodeksiň 370-nji, 371-nji we 372-nji maddalaryna üýtgetmeler girizildi. Türkmenistanyň raýatynyň pasporty bilen bagly düzgünleriň bozulmagy üçin jogapkärçiligi göz öňünde tutýan bu kanuna Türkmenistanyň Prezidenti Serdar Berdimuhamedow 2026-njy ýylyň 11-nji aprelinde gol çekdi. Täze düzgünler 2026-njy ýylyň 1-nji maýyndan güýje girer.
Täze tertibe görä, pasportyň seresapsyz saklanmagy netijesinde onuň zaýalanmagy ýa-da ýitirilmegi üçin birden üç binýatlyk mukdara çenli, pasporty bilkastlaýyn zaýalamak üçin bolsa üçden bäş binýatlyk mukdara çenli jerime bellenilýär. Şeýle-de degişli maddalarda görkezilen beýleki düzgün bozmalary üçin jerimeleriň möçberi ýokarlandyryldy.
Mundan başga-da, pasporty kanuny esas bolmazdan almak ýa-da ony zamun hökmünde kabul etmek gadagan edildi. Şeýle ýagdaýlar üçin fiziki şahslara birden iki binýatlyk mukdara çenli, wezipeli şahslara bäş, hukuk şahslaryna bolsa alty binýatlyk mukdar möçberinde jerime salynar.