Türkmenabatly tälimçiniň şägirtleri halkara ýaryşlarda ýeňiji bolýarlar
Lebap welaýatynda geljegine uly bil baglanýan ýaş küştçüleriň birnäçesi kemala gelýär. Aýa we Güneş Baýramowalar, Mähri Agamyradowa, Begmyrat Agamamedow, Laçyn Isaýewa, Hangeldi Myradow… Bular diňe bir welaýatda däl, eýsem, ýurt derejesinde hem tanalýan ýaş küştçülerdir.
Türkmenabat şäherindäki 13-nji sport mekdebinde welaýatymyzyň küşt boýunça uly tälimçisi Güljahan Öwlýakulyýewanyň kämillik mekdebini geçýän bu ýaş zehinler yzygiderli türgenleşikleriň netijelerinde öz başarnyklaryny yzygiderli artdyrýarlar. Olar ýakynda «Ýeňişlerden ýeňişlere» diýen at bilen geçirilen welaýatyň birinjiliginde hem nobatdaky gezek iň ýokary netijäni görkezen türgenleriň sanawynda öňdeligi eýelediler.
Ussat halypanyň körpe şägirtleri halkara ýaryşlarynda hem öz başarnyklaryny görkezmegi dowam etdirýärler. Olardan Aýa Baýramowanyň gazanýan ýeňişleri aýratyn öwgä mynasypdyr. Geçen ýyl 8 ýaşa çenli gyzlaryň arasynda Türkmenistanyň birinjiliginde kümüş medala mynasyp bolan Aýa üstümizdäki ýylda 11 ýaşa çenli gyzlaryň arasynda ýurdumyzyň çempionlygyny gazandy. Şeýle hem ol bu ýeňşini küştüň rapid görnüşi boýunça 10 ýaşa çenli gyzlaryň arasynda geçirilen döwlet ýaryşynda hem gaýtalady. Ol küştüň adaty, blis görnüşleri boýunça-da ýurdumyzyň ýaş küştçüleriniň üçlüginde orun aldy. Aýanyň halkara ýaryşlaryndaky üstünlikleri-de artyp barýar. Ol geçen ýyl Özbegistanyň Daşkent şäherinde geçirilen Aziýa çempionatynda üstünlikli çykyş eden bolsa, bu ýyl Albaniýada küşt boýunça geçirilen dünýä çempionatynda 11 ýaşa çenli gyzlaryň arasynda bürünç medala mynasyp boldy. Aýanyň jigileri Süleýman bilen Güneş hem küşt boýunça Türkmenistanyň birinjiliklerine gatnaşyp, barha kämilleşýärler.
