Türkmenabatly mugallym 10 ýyla golaý wagt bäri ýaş nesle ýapon dilini öwredip gelýär
Kristina Çaryýewa eýýäm 10 ýyla golaý wagt bäri türkmenabat şäherindäki 35-nji orta mekdepde ýaş nesle ýapon dilini öwredýär.
Bu mekdepde 2016-njy ýylda ýapon dilini okatmak ýola goýuldy. Çagalary okatmaklyk bu ugurdan ýokary bilimli hünärmen Kristina Çaryýewa ynanyldy. Onuň ýapon dilini okatmakda, öwretmekde alyp barýan işleri bellenilmäge mynasypdyr.
Kristina Çaryýewa iş tejribesini artdyrmak maksady bilen ençeme gezek Aşgabat şäherinde kämilleşdiriş okuwlaryny geçdi. Mugallym ýapon dilini okatmakda özboluşly döwrebap usullardan peýdalanyp, sapaklary täsirli guraýar.
Ol welaýat baş bilim müdirligi tarapyndan ençeme gezek Hormat hatlaryna mynasyp boldy.
