Türkmenabatdaky çagalar baglarynyň iň gowy şepagat uýasy kesgitlenildi
Welaýat baş bilim müdirliginiň guramagynda Türkmenabat şäherindäki 32-nji çagalar bagynda çagalar baglarynyň şepagat uýalarynyň arasynda yglan edilen bäsleşigiň Türkmenabat şäher tapgyry geçirildi.
«Körpe nesliň saglygy — ýurduň bagtyýarlygy» diýen at bilen geçirilen bäsleşige şepagat uýalarynyň 66-sy gatnaşdy. Bu ýere ýygnanan şepagat uýalary çagalar baglarynda arassaçylyk düzgünlerini berjaý etmekde ulanylýan zyýansyzlandyryş serişdeleriniň erginlerini taýýarlamak, ilkinji şikes ýetmelerde körpelere kömek bermek, iýmit önümleriniň dürli görnüşlerinden tagamnama düzmek boýunça ukyp-başarnyklaryny ýüze çykardylar.
Netijede, şäheriň 4-nji çagalar bagynyň şepagat uýasy Mähri Rozyýewa birinji orna mynasyp boldy we bäsleşigiň welaýat tapgyryna gatnaşmaga hukuk gazandy. Has tapawutlanyp çykyş eden şepagat uýalarynyň birnäçesi baýraklar bilen sylaglanyldy.
