Türkmenabatdaky 1-nji hünär-tehniki okuw mekdebi 1-nji iýuldan resminama kabul edip başlar
Türkmenabat şäher häkimliginiň Türkmenistanyň Gahrymany Gurbansoltan eje adyndaky 1-nji hünär-tehniki okuw mekdebi täze okuw ýylynda okuwa girmek isleýän dalaşgärlerden 1-nji iýuldan resminamalaryny kabul edip başlar. Bu barada welaýat neşirinde bildiriş berildi.
Neşiriň 27-nji iýundaky sanynda ýerleşdirilen bildirişde hem görkezilişi ýaly, mekdepde ýaşlara 19 hünär boýunça bilim berilýär. Okuwyň möhleti 1 ýyldan 1,5 ýyla çenli üýtgeýär. Mekdebe resminama tabşyryşyk möwsümi 1-nji iýulda başlanyp, 20-nji awgustda tamamlanýar. Giriş synaglary 20 ― 25-nji awgust aralygynda geçiriler. Synaglar ähli hünärler boýunça iki dersden bolar.
Şeýle hem mekdep 11 hünär boýunça 3 aýdan 6 aýa çenli gysga wagtlyk okuwlary hem hödürleýär. 1 we 1,5 ýyllyk okuwlary tamamlan uçurymlara başlangyç hünär bilimi hakynda diplom, gysga möhletli okuwlaryň diňleýjilerine bolsa degişli nusgadaky hünär taýýarlygy hakynda şahadatnama berilýär.
Mekdep Türkmenabat şäheriniň Berdi Kerbabaýew köçesiniň 34-nji jaýynda ýerleşýär. Telefon belgileri: +993 (422) 5-66-12; 5-66-13.
