Türkmenabatda ýurduň ähli ýerlerinden gelen suratkeşleriň bilelikdäki sergisi guraldy

Welaýat medeniýet müdirliginiň hem-de Türkmenistanyň Suratkeşler birleşiginiň welaýat şahamçasynyň bilelikde guramaklarynda Gahryman Arkadagyň «Hakyda göwheri» atly kitabyndan ugur alnyp, döredijilik sergisi guraldy. Oňa ýurduň ähli welaýatlaryndan suratkeşleriň 20-ä golaýy gatnaşdy.
Simpoziuma gatnaşyjy suratkeşler bir hepdäniň dowamynda Darganata etrabynyň çäginde ýerleşýän gadymy Dargan galasynda, Daýahatyn kerwensaraýynda, tebigatymyzyň gözel ýerlerinde, Amyderýanyň kenar ýakasynda bolup, dürli öwüşginli surat eserlerini döretdiler. Simpoziumyň ahyrky gününde welaýat taryhy we ülkäni öwreniş muzeýinde suratkeşleriň döreden eserleriniň sergisi guraldy. Serginiň açylyş dabarasyna ýurdumyzyň ähli künjeginden gelen suratkeşler, welaýatymyzyň medeniýet edaralarynyň
ýolbaşçylary, welaýat ýörite sungat mekdebiniň talyplary, Türkmenabat şäherindäki çagalar çeperçilik mekdebiniň mugallymlary we okuwçylary gatnaşdylar. Köpöwüşginli serginiň açylyş dabarasynda Türkmenistanyň halk suratkeşleri Öwezmämmet Öwezmämmedow, Işanguly Işangulyýew,
Türkmenistanyň sungatda at gazanan işgäri Myrat Baltaýew dagy çykyş edip, Gahryman Arkadagymyzyň «Hakyda göwheri» atly ajaýyp eseriniň çuňňur mazmunyny açyp görkezmek, türkmen halkynyň şöhratly taryhyny şöhlelendirmek, türkmen tebigatyna söýgi döretmek boýunça sungat işgärleriniň, şol sanda suratkeşleriň alyp barýan işleri barada aýdyp geçdiler.
Simpoziumyň dowamynda oňa gatnaşyjylar suratkeşleriň döreden eserleriniň üsti bilen ýurdumyzyň Gündogar sebitine mahsus bolan milli we tebigy aýratynlyklar, gadymy ýadygärlikler, taryhy döwürde adamlaryň ýaşaýyş-durmuş şertleriniň özboluşlylygy bilen ýakyndan tanyşmaga mümkinçilik aldylar.