Türkmenabatda türkmen-özbek forumy geçirildi
Şu gün Türkmenabat şäherindäki «Türkmeniň Ak öýi» binalar toplumynda
Türkmenistanyň we Özbegistan Respublikasynyň ikinji sebitara forumy geçirildi.
Forumyň işine iki döwletiň ýokary derejeli wekilleri, Türkmenistanyň we
Özbegistanyň Söwda-senagat edaralarynyň, iki ýurduň käbir welaýatlarynyň
ýolbaşçylary, şeýle hem degişli ministrlikleriň, pudaklaýyn dolandyryş
edaralarynyň işgärleri gatnaşdylar.
Forumda edilen çykyşlarda türkmen-özbek söwda we ykdysady
gatnaşyklarynyň soňky ýyllardaky ösüşine kanagatlanma bildirildi. Nygtalyşy ýaly, iki ýurduň arasynda geçen ýyl 1 milliard amerikan dollaryndan hem geçen söwda gatnaşyklarynyň üstümizdäki ýylda has ýokary derejelere eýe bolmagyna garaşylýar. Şunda goňşy döwletleriň Söwda-senagat edaralarynyň, degişli ministrlikleriniň we welaýatlarynyň arasyndaky hyzmatdaşlyga aýratyn uly orun degişlidir.
Forumyň çäklerinde şu gün ikitaraplaýyn duşuşyklaryň hem birnäçesi geçirildi.
Onuň jemleýji böleginde bolsa ikitaraplaýyn resminamalara gol çekildi.
Şu gün bu ýerde geçirilen Özbegistanda öndürilen harytlaryň milli sergisi hem öz işini tamamlady.
