Türkmenabatda Seýitnazar Seýdä bagyşlanan maslahat geçirildi

Seýitnazar Seýdi adyndaky Türkmen döwlet mugallymçylyk institutynda serkerde şahyryň doglan gününiň 250 ýyllygy mynasybetli «Seýitnazar Seýdiniň döredijiliginde döwrüň taryhy wakalarynyň çeper beýany» ady bilen sanly ulgam arkaly okuw-usuly maslahat geçirildi.
Oňa ýurduň ýokary we orta okuw mekdepleriniň mugallymlary, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň ylmy işgärleri, şeýle hem talyp ýaşlar gatnaşdylar. Okuw-usuly maslahatyň açylyş dabarasynda türkmen edebiýatynyň taryhynda öçmejek yz galdyran nusgawy şahyr Seýitnazar Seýdiniň serkerde-şahyrlyk ýoly, XVIII asyryň taryhyny öwrenmekde şahyryň döredijiliginiň ähmiýeti barada çuňňur mazmunly çykyşlar diňlenildi.
Umumy mejlisden soňra okuw-usuly maslahat bölümleriň 4-si boýunça aýratynlykda dowam etdirildi. Şahyryň edebi mirasyny öwrenmeklige, ony ýaş nesilleriň arasynda wagyz etmeklige bagyşlanan maslahatda çykyşlaryň 140-a golaýynyň diňlenilmegi, olarda nusgawy şahyryň döredijiligi bilen baglanyşykly taryhy wakalaryň seljerilmegi, serkerde şahyryň watançylyk, gahrymançylyk, merdanalyk baradaky goşgulary bilen birlikde yşky-liriki şygyrlarynyň çuňňur mazmunynyň çözlenilmegi onuň aýratyn uly ähmiýete eýe bolandygyny subut edýär.