Türkmenabatda şaşka boýunça welaýat birinjiligi geçirildi
Türkmenabat şäherindäki 13-nji sport mekdebinde 100 öýjükli şaşka boýunça 10, 14 we 18 ýaşa çenli ýetginjekleriň arasynda welaýatyň birinjiligi geçirildi. Oňa Türkmenabat şäherinden we etraplardan ýetginjek türgenleriň onlarçasy gatnaşdy. Her bir duşuşygy çekeleşikli geçen ýaryşda 10 ýaşa çenli oglanlaryň arasynda türkmenabatly türgen Rahman Karýagdyýewe taý tapylmady. 10 ýaşa çenli gyzlaryň arasyndaky ýaryşda bolsa öňdäki orunlaryň ählisini türkmenabatly şaşkaçylar eýelediler.
Aýnur Şirliýewanyň iň gowy netijäni görkezen ýaryşynda Hatyja Mahmudowa ikinji, Gunça Ýusubowa bolsa üçünji orunlara mynasyp boldular. Ýaryşyň netijesi 14 ýaşa çenli ýetginjeklerde hem öňdäki orunlary welaýat merkeziniň we Dänew etrabynyň wekilleriniň paýlaşandyklaryny görkezýär. Şu ýaş derejesinde oglanlaryň arasynda öňdäki üç orny türkmenabatly Azym Myradow, dänewli Umyt Serdarow we türkmenabatly ýene bir türgen KamyljanZafarow dagy eýeledi. Gyzlaryň arasynda geçirilen ýaryşda bolsa welaýat merkezinde türgenleşýän Şirin Kadyrowa, Şirin Ahmedowa we Selbi Hemraýewa, degişlilikde, birinji, ikinji hem-de üçünji orunlary paýlaşdylar. Ozalyndan hem garaşylyşy ýaly, 18 ýaşa çenli ýetginjekleriň arasyndaky ýaryş has çekeleşikli we gyzykly boldy. Her öýjük üçin müň bir pikir otarylan ýaryşyň netijesinde oglanlaryň arasynda iň ýokary netijäni Türkmenabat şäherinden Atamyrat Jumaýew görkezdi. Gyzlaryň arasyndaky ýaryşda türkmenabatly türgen Maral Haýydowa hemmelerden rüstem geldi.
