Türkmenabatda futzal boýunça Naýbaşy liganyň birinji aýlawy geçirildi, ýaryşa Lebapdan üç topar gatnaşýar

Türkmenabat şäherinde Türkmenistanyň Naýbaşy futzal ligasynyň deslapky tapgyrynyň birinji aýlawynyň duşuşyklary tamamlandy. Ýurdumyzyň çempiony adyny almak ugrunda sekiz topar göreşýär. Olaryň hatarynda Lebap welaýatyna wekilçilik edýän üç topar — «Farap», «Gümrükçi» hem-de «Nesil» toparlary çykyş edýär. Birinji aýlawyň ähli duşuşyklary Lebap welaýatynyň Bedenterbiýe we sport baradaky baş müdirliginiň 10-njy sport mekdebiniň sport toplumynda geçirildi.
Deslapky tapgyr iki toparçada dowam edýär. “A” toparçada «Köpetdag», «Farap», «Senagatbank», «Gümrükçi» toparlary bäsleşýär. Birinji aýlawyň netijeleri boýunça bu toparçada «Köpetdag» 9 utuk bilen birinji, «Gümrükçi» 6 utuk bilen ikinji orny eýeleýär. «Senagatbank» 3 utuk bilen üçünji, «Farap» topary heniz utuk gazanyp bilmän dördünji ýerde ýerleşdi. Üçünji tapgyryň wagty süýşürilen duşuşygynda «Senagatbank» topary «Faraby» 9:3 hasabynda ýeňdi.
“B” toparçada «Deňizçi», «Migrasiýa», TNGIZT hem-de «Nesil» toparlary çykyş edýär. Bu toparçada birinji aýlawdan soň «Deňizçi», «Migrasiýa» we TNGIZT toparlarynyň hersi 6 utuk toplady. «Nesil» topary häzirlikçe utuksuz galdy. Üçünji tapgyryň duşuşyklarynda «Migrasiýa» «Nesili» 11:5, «Deňizçi» bolsa TNGIZT toparyny 6:3 hasabynda ýeňdi. Naýbaşy futzal ligasynyň ikinji aýlawynyň duşuşyklary şu ýylyň maý aýynda Mary şäherinde geçiriler.