Türkmenabatda dürli halklaryň wekilleriniň gatnaşmagynda baýramçylyk dabarasy geçirildi

Türkmenabat şäherindäki «Bagt köşgi» toý-dabaralar merkezinde Türkmenistanyň Zenanlar birleşiginiň Merkezi Geňeşi we ýurdumyzyň Kärdeşler arkalaşyklarynyň Milli merkezi tarapyndan yglan edilen «Maşgalam ― baş galam» atly duşuşyk çäresi geçirildi. Halkara parahatçylyk we ynanyşmak ýylynda hemişelik Bitaraplygymyzyň şanly 30 ýyllygy mynasybetli geçirilen duşuşyga welaýatymyzyň etrap-şäherlerinde ýaşaýan dostlukly halklaryň wekilleri gatnaşdylar.
Duşuşygyň başynda oňa gatnaşyjylar hormatly Prezidentimiziň parasatly baştutanlygynda Garaşsyz, hemişelik Bitarap Watanymyzda maşgalalaryň bagtyýarlygyny gorap saklamak barada edilýän yzygiderli aladalar hakynda buýsançly gürrüň etdiler. Ýurdumyzda halklaryň dostlugyny pugtalandyrmak, baky berkararlygymyzyň gadyr-gymmatyny ýaş nesle düşündirmek babatda amala aşyrylýan işler baradaky ýürekdeş söhbetdeşlik bu duşuşyga aýratyn öwüşgin çaýdy. Soňra oňa gatnaşyjylar Watanymyzyň ösüşlerini, döwrümiziň galkynyşyny goşgudyr gazallar, aýdym-sazlar, tanslar bilen şowhunly wasp etdiler.