Türkmenabatda çagalaryň arasynda «Ýaşyl yşyk» bäsleşigi geçirildi

«Ýol hereketiniň howpsuzlygy — ömrümiziň rahatlygy» atly biraýlygyň çäklerinde welaýatda ýol hereketiniň düzgünlerini wagyz etmek boýunça çäreler dowam edýär. Çagalar baglarynda, ýokary okuw mekdeplerinde, edara-kärhanalarda ýolagçynyň ýolda özüni alyp barmak medeniýeti, pyýada bilen sürüjiniň sazlaşykly hereketi, ýol howpsuzlygynyň düzgünleri barada açyk sapaklar we maslahatlar guralýar. Şu maksat bilen welaýat baş bilim müdirligi Türkmenabat şäherinde «Ýaşyl yşyk» atly bäsleşigi geçirdi.
Bäsleşige şäherdäki mekdebe çenli çagalar edaralarynyň onlarça körpesi gatnaşdy. Olar ýol hereketiniň düzgünleri boýunça soraglara jogap berdiler, belgileri tanamakda we surat çekmekde ukyp-başarnyklaryny görkezdiler. Netijede 62-nji çagalar bagynyň topary birinji, 45-nji we 66-njy çagalar baglarynyň toparlary ikinji, 38-nji, 41-nji we 58-nji çagalar baglarynyň toparlary üçünji orunlara mynasyp boldy. 10-njy we 52-nji çagalar baglarynyň körpelerine höweslendiriji baýraklar gowşuryldy.