Türkmenabatda Bilim ministrligi tarapyndan geçirilýän okuw maslahatyna badalga berildi
Türkmenabat şäherindäki 64-nji çagalar bakja-bagynyň binýadynda «Mekdebe çenli çagalar edaralarynda körpeleriň tebigy zehinini ýüze çykarmakda we olaryň durmuş endiklerini ösdürmekde many-mazmunly oýunlary guramagyň öňdebaryjy iş usullary» atly iki günlük usuly-amaly maslahat badalga aldy. Türkmenistanyň Bilim ministrligi tarapyndan geçirilýän bu çärä ýurdumyzyň ähli welaýatlarynyň, Aşgabat hem-de Arkadag şäherleriniň öňdebaryjy bilim işgärleri gatnaşýarlar.
Irden maslahatyň dabaraly açylyşy boldy. Çäräniň geçirilýän ýerinde şadyýan çagalaryň aýdym-sazly çykyşlary guraldy. Soňra maslahata gatnaşyjylar Türkmenabat şäherindäki 63-nji, 64-nji, 65-nji çagalar bakja-baglarynyň terbiýeçileriniň guran göreldeli okuw sapaklaryna gatnaşdylar. Hususan-da, mekdebe taýýarlaýyş toparynyň körpeleri bilen iňlis dili sapagynda guralan «Miweler» oýny, orta we kiçi bag toparlarynda sözleýşi ösdürmek boýunça guralan oýunlar ähmiýetliligi bilen tapawutlandy.
Günüň ikinji ýarymynda mekdebe çenli çagalar edaralarynda sowat öwretmek sapaklarynda didaktiki oýunlary geçirmegiň usullary, çagalaryň döredijiliginiň, özbaşdak pikir edip bilmek ukyplarynyň ösmeginde many-mazmunly oýunlaryň ähmiýeti diýen mowzuklarda nutuklar diňlenildi. Soňra maslahatyň birinji gününiň jemi jemlendi. Onda maslahata gatnaşyjylaryň bilim-terbiýeçilik işini kämilleşdirmek boýunça teklipleri diňlenildi we özara pikir alyşmalar boldy.
