Türkmen-özbek forumy netijeli gepleşiklere baý bolar
Türkmenabat şäherinde Türkmenistanyň we Özbegistan Respublikasynyň ikinji
sebitara forumynyň we Özbegistanda öndürilýän harytlaryň milli sergisiniň
çäklerinde ikitaraplaýyn duşuşyklaryň birnäçesi geçiriler.
Ertir ― 20-nji noýabrda günüň birinji ýarymynda iki döwletiň wekiliýetleriniň
ýolbaşçylarynyň duşuşygy meýilleşdirilýär. Günüň ikinji ýarymynda bolsa bilelikdäki sebitara forum öz işine başlar.
21-nji noýabrda çäreleriň çäklerinde «Türkmenistanda we Özbegistan Respublikasynda syýahatçylyk pudagynyň durnukly ösüşi: syýahatçylyk ulgamynda hyzmatdaşlygyň mümkinçilikleri», «Türkmen we özbek halklary ― baý medeni we ylmy däpleriň mirasdüşerleri we saklaýjylarydyr» atly «tegelek stoluň» başyndaky söhbetdeşlikleri geçirmek meýilleşdirilýär.
Şeýle hem şol gün iki ýurduň hususy kompaniýalarynyň wekilleriniň we telekeçileriniň arasynda ikitaraplaýyn duşuşyklar geçiriler.
