Türkmen kompaniýalary Astanada geçiriljek «TransLogistica Kazakhstan—2024» sergisine gatnaşarlar
2024-nji ýylyň 9-11-nji oktýabry aralygynda Gazagystanyň paýtagty Nur-Sultanda «Ulag we Logistika» — «TransLogistica Kazakhstan—2024» halkara sergisi geçiriler. Bu çäre EXPO Halkara sergi merkezinde bolar.
Sergi ulag we logistika pudagynda ähmiýetli waka bolar diýlip garaşylýar, onda bu ugra degişli bolan dürli çözgütler hödürlener. Çäräniň dowamynda oňa gatnaşyjylar ýük daşama-ekspeditorçylyk hyzmatlaryndan başlap häzirki zaman programma üpjünçiligine we ýük gatnatmaklyga dahylly enjamlara çenli ähli täzelikler bilen tanyşdyrylar.
Sergä 20 ýurtdan 200-e golaý kompaniýanyň gatnaşmagyna garaşylýar. Bu çärede Türkmenistana iki kompaniýa: «Köňül Arzuwy» we hususy kärhana «Hazar Ýol» wekilçilik eder.
Serginiň maksatnamasy boýunça dört sany pudaklaýyn maslahat geçiriler, ulag hepdesiniň netijeleri barada EKSPERT TALKS, «Gazagystan – Niderlandlar Işewürler Geňeşi, şeýle hem çärä gatnaşyjy kompaniýalaryň tanyşdyryş çykyşlary bolar. Şeýle hem gatnaşyjylar kompaniýalaryň logistika ulgamy boýunça täze işläp taýýarlamalary we ýeten sepgitleriniň tanyşdyrmalaryny görüp bilerler.
Guramaçylar bu pudagyň bilermenlerini, ulag edaralaryň ýolbaşçylaryny we logistika kompaniýalarynyň baş dolandyryjylaryny çärä gatnaşmaklyga çagyrýar.
