Türkiýede Ýewropadaky iň uly gün elektrik stansiýasy açylar
5-nji maýda Türkiýäniň Konýa welaýatynda Ýewropadaky iň uly gün elektrik stansiýasy işe başlar.
Anadolu gullugynyň habaryna görä, «Karapinar» diýlip atlandyrylan bu elektrik stansiýasynyň kuwwaty 1350 MWt we meýdany 20 million inedördül metre ýetýär. Stansiýada 3 million 256 müň 38 gün paneli oturdyldy. Desganyň gurluşygy 2020-nji ýylyň ýanwar aýynda başlanypdy.
«Karapinar» gün elektrik stansiýasy doly işe başlanda, Türkiýäniň gün energetikasynyň kuwwaty 20 göterim ýokarlanar. Taslamanyň umumy bahasy 1 milliard dollar diýlip bahalanýar. Bu mukdaryň ep-esli bölegi Britaniýadaky UKEF eksport-kredit gullugynyň ugry boýunça aýrylar- diýlip, habar berilýär.
Gün elektrik stansiýasy ýylda 3 milliard KWt elektrik energiýasyny öndürýär. Bu Türkiýäniň elektrik energiýasynyň sarp edilişiniň 1 göterimini öz içine alýar. Takmynan 2 million adamyň elektrik energiýasyna bolan zerurlygy kanagatlandyrylýar. Mundan başga-da, bu elektrik stansiýasy 2 million tonna zyýanly galyndylaryň howa ýaýramagynyň öňüni alýar.
