Tiz wagtdan Aziýa Kubogy-2023-iň saýlama tapgyrynyň bijeleri çekiler
Futbol boýunça Hytaýda geçiriljek Aziýa Kubogy-2023-iň bije çekişlik dabarasy 24-nji fewralda geçirilip, onuň netijesinde Türkmenistanyň milli ýygyndysy öz garşydaşlaryny biler. Bije çekişlik dabarasynyň onlaýn arkaly Kuala-Lumpur şäherinde geçirilmegine garaşylýar. Bu barada Türkmenistanyň Futbol federasiýasynyň saýtynda habar berilýär.
Türkmenistanyň futbol boýunça milli ýygyndysynyň 10-njy fewralda täzelenjek FIFA-nyň reýtinginde eýelejek ornuna laýyklykda, Aziýa kubogynyň 3-nji saýlama tapgyrynyň bije çekişliginde, ikinji sebede düşmegine garaşylýar.
Bije çekişlikde ýygyndylaryň ýerleşjek sebetleriniň deslapky görnüşi:
1-nji sebet: Özbegistan, Bahreýn, Iordaniýa, Gyrgyz Respublikasy, Palestina, Hindistan;
2-nji sebet: Taýland, Täjigistan, Filippinler, Türkmenistan, Kuweýt, Gonkong;
3-nji sebet: Owganystan, Ýemen, Mýanma, Malaýziýa, Maldiwler, Indoneziýa;
4-nji sebet: Singapur, Nepal, Kamboja, Mongoliýa, Bangladeş, Şri-Lanka.
Bije çekişligiň netijesinde toparçalaryň 6-sy emele geler. Duşuşyklary merkezleşdirilen görnüşinde geçiriljek toparçalaýyn bäsleşigiň netijesinde her toparçanyň ýeňijisi bilen ikinji orunlary eýelän ýygyndylaryň 5-si Aziýa Kubogynyň final böleginde çykyş etmäge mümkinçilik alar. Toparçalaýyn bäsleşikleriň geçiriljek ýerleri we möhleti soň belli ediler.
Ýeri gelende bellesek, häzirki wagtda milli ýygyndylaryň 13-si Aziýa Kubogynyň final böleginde çykyş etmäge mümkinçilik aldylar – Siriýa, Awstraliýa, Eýran, Saud Arabystany, Ýaponiýa, BAE, Koreýa Respublikasy, Oman, Yrak, Wýetnam, Liwan, Katar Hytaý (ýer eýesi).
Yklym ýaryşynyň final böleginiň 2023-nji ýylyň 16-njy iýuny bilen 16-njy iýuly aralygynda Hytaýyň 10 şäherinde (Pekin, Týanszine, Şanhaý, Çunsin, Çendu, Sian, Dalýan, Sindao, Sýamyn Suçjou) geçirilmegine garaşylýar.
