TDMI-niň mugallymy türkmençe-parsça sözlügi awtordaşy boldy

Seýitnazar Seýdi adyndaky Türkmen döwlet mugallymçylyk institutynyň Gündogar dilleri we edebiýaty, olary okatmagyň usulyýeti kafedrasynyň mugallymy Arzuw Setdarowanyň we Türkmenistanyň Bilim ministrliginiň baş hünärmeni Omargeldi Myradowyň awtordaşlygynda “Türkmençe-parsça gepleşik sözlügi” atly okuw gollanmasy neşir edildi. Täze neşir pars dilini öwrenmegiň häzirki zaman talaplaryna laýyklykda taýýarlanylyp, dil öwrediş işine ylmy-usuly taýdan möhüm goşant boldy.
Gepleşik sözlüginde pars dilinde erkin we dürs geplemegi öwrenmäge gönükdirilen okuw derslerine, özbaşdak ýerine ýetirilýän ýumuşlara degişli grammatiki maglumatlar, leksika-semantik bölümler hem-de adalgalar giňden orun alýar. Bu bolsa gollanmanyň mazmun taýdan gymmatyny has-da artdyrýar. Neşir pars dilini öwrenýän talyplar, mekdep okuwçylary, şeýle-de bu dile gyzyklanma bildirýän okyjylar üçin peýdaly gollanma bolup hyzmat eder.