Soňky bäş ýylda Türkmenistanda bugdaýyň satyn alyş nyrhy 5, pagtanyňky 3,3 esse ýokarlandyryldy
Bu barada welaýat «Türkmen gündogary» gazetinde çap edilen makalada syn berilýär.
Makalanyň awtorynyň nygtaýşy ýaly, bugdaýyň we pagtanyň döwlet satyn alyş bahalary soňky gezek 2019-njy ýylda üýtgedilipdi. Şol ýylda bugdaýyň bir tonnasynyň döwlet satyn alyş bahasy 2 esse, ýagny 400 manat bolandygyndan 800 manada çenli ýokarlandyryldy. 2024-nji ýylyň hasylyndan başlap, bugdaýyň bir tonnasyny döwletimiz daýhandan 2000 manatdan satyn alýar. Öňküsinden tapawutlylykda bu ýyl bugdaýyň bir tonnasynyň bahasy 2,5 esse ýokarlandyryldy.
Pagtanyň 2019-njy ýyldaky döwlet satyn alyş nyrhlaryna hem göz aýlalyň. Şonda bir tonna nah pagtanyň satyn alyş bahasy ýygymyň başlanan gününden 15-nji oktýabra çenli 1 müň 500 manat, 15-nji oktýabrdan 15-nji noýabra çenli 1 müň 430 manat, 15-nji noýabrdan ýygymyň tamamlanýan gününe çenli 1 müň 365 manat bolupdy.
2024-nji ýyldan nah pagtanyň bir tonnasy üçin döwlet satyn alyş bahalary ýygymyň başlanýan gününden 15-nji oktýabra çenli 5 müň manat, 15-nji oktýabrdan 15-nji noýabra çenli 4 müň 770 manat, 15-nji noýabrdan ýygymyň tamamlanýan gününe çenli 4 müň 550 manat möçberde bolar. Ýüpek pagtanyň bir tonnasy üçin döwlet satyn alyş bahalary ýygymyň başlanýan gününden 15-nji oktýabra çenli 6 müň 700 manat, 15-nji oktýabrdan 15-nji noýabra çenli 6 müň 400 manat, 15-nji noýabrdan ýygymyň tamamlanýan gününe çenli 6 müň 100 manat möçberde kesgitlenildi.
