«Senagat töleg» işe girizildi
Türkmenistanyň «Senagat» paýdarlar täjirçilik banky raýatlaryň haýyr-sahawat serişdelerini geçirmek üçin «Senagat töleg» mobil goşundysyny işe girizdi. Goşundy türkmenistanlylara Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna haýyr-sahawat serişdelerini geçirmek üçin nagt däl görnüşinde töleg etmek mümkinçiligini özünde jemleýär. Bu barada «Türkmenistan» gazeti habar berýär.
Mobil goşundy smartfonlarda ýa-da planşetlerde hakyky wagtda bank amallaryny amala aşyrmaga mümkinçilik döredýär. Ony «Google Play» we «App Store» boýunça ýükläp bilersiňiz. Goşundyny ýüklemek bilen, «Altyn Asyr» bank kartlary bolan Türkmenistanyň raýatlary Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna pul serişdelerini geçirip bilerler.
Bu mobil goşundy umumy 11 hyzmat boýunça tölegleri geçirmäge mümkinçilik berýär. Şolaryň hatarynda internet hyzmatlary, IPTV, öý telefonlarynyň tölegleri we beýlekiler bar.
