Saz durmuşynyň üstünligi
-Türkmen mydam saza gadyr goýupdyr,
Barlyk içre çyn halypa uýupdyr,
Ol ne bagdyr, ajap çemen bogupdyr,
Ruhy baýlyk, nedir datly miwesi.
Türkmen medeniýetiniň we sungatynyň gülläp ösýän döwründe, saz sungatyna aýratyn üns berilýär. Hormatly Prezidentimiziň tagallasy bilen ýurdumyzda hereket edýän sungat ojaklarynyň sany gün – günden köpelýär . Çagalar sazçylyk we sungat mekdepleriniň mugallymlary we ýaş zehinli okuwçylary döredilýän giň mümkinçiliklerden peýdalanyp, milli saz sungatymyzy dünýä ýaýmakda janyny gaýgyrman işleýärler. Şeýle mugallymlaryň hatarynda hem ýaşlygyna seretmezden saza bolan söýgüden kalby püre – pür zehinli ynsan we mugallym Ilgar Atahanowdyr. Ol Lebap welaýatynyň Çärjew etrabynyň çagalar sungat mekdebinde zähmet çekip, özüniň zähmetsöýerligi we kärine wepalylygy bilen eýýäm ýurdumyzda diňe hor dirižýorlarynyň arasynda däl , eýsem ähli nusgawy saz söýüjileriň we mugallymlaryň arasynda uly hormatdan peýdalanýar diýsek ýalňyşmarys. Mugallym öz işinde halypalary bolan Lebap welaýat ýörite sungat mekdebiniň baýry mugallymlary Muhtar Musaýew, Türkmenistanyň sungatda at gazanan işgäri Döwlet Sahatow, Türkmenistanyň Halk artisti Bäşim Berdiýew, Maýa Kulyýewa adyndaky Türkmen Milli Konserwatoriýasynyň mugallymy Gülbahar Muhammedowa dagylardan alan tälimlerini, maslahatlaryny jemläp, täzeçe usullary utgaşdyryp we repertuar bilen baýlaşdyryp öňe saýlanmagyň hötdesinden geldi. Ýurdumyzda çagalar sungat we sazçylyk mekdepleriniň hor toparlarynyň arasynda ýylyň – ýylyna däp bolup gelýän döredijilik bäsleşiginiň şy ýylky tapgyry hem çekeleşikli geçse – de, Ilgar mugallym öz topary bilen çykyşynyň ilkinji notalaryndan diňleýjileriň ählisini özüne maýyl edip, ýeňiji boljakdygyna hiç hili şübhe goýmady. Topar Lebap welaýat medeniýet müdirliginiň düzen maksatnamasyna laýyklykda üç sany eseri ýerine ýetirdiler. Olar ilki kompozitor R.Allaýarowyň G. Ezizowyň sözüne döreden “Kebelek” atly çylşyrymly we köpsesli a’kapellasyny , soňra J.Reýimowanyň D.Annamyradowyň sözlerine döreden “Şöhrat saňa, Türkmenistan!” atly dabaraly aýdymyny zehinli mugallym Rejepgül Rozyýewanyň ezberlik bilen sazandarlyk etmeginde şeýle – de A.Menkeniň H.Eşmanyň sözlerine döreden Disneý multfilminiň “Under the sea”(Deňiz astynda) atly şadyýan aýdymyny tans hereketleri bilen üstünlikli ýerine ýetirip, ähli dabara gelen diňleýjileriň dowamly el çarpyşmalaryna eýe boldular. Şeýlelik bilen baş baýrak üçin synanyşmaga gelen welaýatyň çägindäki 10 sany çagalar sazçylyk we sungat mekdepleriniň arasynda öňe saýlanyp, adalatly emin agzalar tarapyndan köp sanly hoş sözlere mynasyp bolan, Çärjew etrabynyň çagalar sungat mekdebiniň hor topary, mugallym Ilgar Atahanowyň ýolbaşçylyk etmeginde Baş baýraga mynasyp boldy. Şeýle üstünlikleriň höwrüniň köp bolmagyny mugallyma we onuň agzybir, zehinli okuwçylaryna arzuwlaýarys.
Lebap welaýatynyň Çärjew etrabynyň çagalar sungat mekdebiniň bölüminiň
mugallymy Gözel Jumaniýazowa
