Saýatdaky kärhanada doňdurmanyň 20-den gowrak görnüşi taýýarlanylýar

Saýat etrabynyň Garamahmyt geňeşliginde ýerleşýän «Enaý» süýt önümlerini öndürýän hususy kärhanasynda doňdurmanyň 20-den gowrak görnüşi taýýarlanylýar. Türkmenistanyň Senagatçylar we telekeçiler birleşmesiniň agzasy Jumagül Annaýewanyň ýolbaşçylygyndaky kärhana 2010-njy ýylda esaslandyryldy.
Kärhanada her gün şahsy hojalyklardan satyn alynýan sygyr süýdüniň 500 litri gaýtadan işlenilýär. Önümçiligiň hasapçysy Maýsa Mämmetgulyýewanyň aýtmagyna görä, bu ýerde her gün dürli tagamly doňdurmalaryň 4 müňe golaýy öndürilýär. Tomus paslynda miwe tagamly we maňyzly doňdurmalara uly isleg bildirilýär.
Döwrebap kärhanada işçi-hünärmenleriň 10-a golaýy zähmet çekýär. Önümçilige Hytaý Halk Respublikasynyň enjamlary ornaşdyrylan. «Enaý» haryt nyşany bilen taýýarlanylýan doňdurmalar Lebap welaýatynyň çäginden daşary Mary, Balkan welaýatlarynyň we Aşgabat şäheriniň söwda nokatlaryna hem ugradylýar.