Berkarar döwletiň täze eýýamynyň Galkynyşy döwründe ýurdumyzyň ykdysady we ruhy ösüşleriniň özenini bilim ulgamynyň kämilleşdirilmegi düzýär. Gahryman Arkadagymyzyň başlangyçlary we hormatly Prezidentimiz Arkadagly Serdarymyzyň taýsyz tagallalary netijesinde, Türkmenistanda bilim ulgamyny sanlylaşdyrmak döwlet syýasatynyň ileri tutulýan ugurlarynyň birine öwrüldi. Bu özgerişlikler diňe bir tehniki täzelik bolman, eýsem ýaş nesliň intellektual derejesini dünýä ölçeglerine laýyk getirmegiň esasy guralydyr.
Sanly bilim ulgamy — bu maglumat-kommunikasiýa tehnologiýalarynyň mümkinçiliklerinden peýdalanyp, okatmagyň hilini we elýeterliligini ýokarlandyrmakdyr. Häzirki wagtda ýurdumyzyň ähli bilim ojaklarynda, şol sanda biziň uniwersitetimizde hem ýokary tizlikli internet ulgamy, elektron resminama dolanyşygy we interaktiw okatmak usullary giňden ornaşdyrylýar. Bu bolsa talyplara we mugallymlara wagty tygşytlamaga, şeýle hem dünýäniň iň täze ylmy maglumatlaryna dessine el ýetirmäge şert döredýär.
Sanlylaşdyrmagyň esasy artykmaçlyklarynyň biri hem okuw prosesiniň yzygiderliligini we aýdyňlygyny üpjün etmekdir. Elektron platformalar arkaly talyplar öz okuw meýilnamalaryny, dersliklerini we wideo-sapaklaryny islendik wagtda gözden geçirip bilýärler. Bu bolsa özbaşdak bilim almagyň medeniýetini kemala getirýär. Şeýle hem, uzak aralykdan bilim bermek (distansion okatmak) arkaly halkara tejribe alşylmagy, dünýäniň öňdebaryjy ýokary okuw mekdepleri bilen wideo-konferensiýalaryň geçirilmegi ýaş hünärmenleriň dünýägaraýşyny giňeldýär.
Şunuň bilen birlikde, sanly bilim ulgamynda kiberhowpsuzlyk we maglumat sowatlylygy ýaly meseleler hem möhüm orun tutýar. Talyplaryň sanly giňişlikde dogry we peýdaly maglumaty saýlap bilmegi, tehnologiýalary diňe bir ulanman, eýsem täze sanly önümleri döretmäge ukyply bolmagy biziň esasy maksadymyzdyr. Bu ugurda uniwersitetimizde alnyp barylýan ylmy-taslama işleri ýaşlaryň innowasion pikirlenmesini ösdürmäge uly itergi berýär.
Sözümiň ahyrynda bellesem, sanly bilim ulgamynyň ösdürilmegi ýurdumyzyň sanly ykdysadyýetine goşjak iň uly goşandymyzdyr. Biz — ýaşlar, döwletimiziň döredip berýän bu giň mümkinçiliklerinden peýdalanyp, öz ukyplarymyzy ýurdumyzyň has-da gülläp ösmegine gönükdirmelidiris. Sanly dünýäniň täze eýýamynda bilimli, sowatly we kämil hünärmenler bolup ýetişmek her birimiziň mukaddes borjudyr.
WELIÝEW Mämmetkerim,
Halkara senagatçylar we telekeçiler uniwersitetiniň
dil öwreniş bölüminiň 107-nji okuw toparynyň talyby.
