Saglyk baýramynda aýdym-saz sowgady
Bütindünýä saglyk güni mynasybetli Amyderýanyň üstünden geçýän Türkmenabat ― Farap awtoulag köprüsinden badalga alan we Türkmenabat şäherindäki 10 müň orunlyk sport toplumynda pellehana gelen köpçülikleýin welosipedli ýörişe welaýat çagalar sungat mekdebiniň mugallymlarydyr okuwçylary hem agzybirlik bilen gatnaşdylar. Ol diňe bir menzilleri külterlemek bilen çäklenmän, ýörişiň başlangyç nokadynda we Türkmenabat şäheriniň dürli ýerlerinde aýdym-sazly çykyşlar hem bilen hem ýörişe gatnaşyjylaryň göwnüni göterdiler.
Mekdebiň aýdym-saz toparlarynyň gorunda sagdyn durmuş ýörelgesine wasp edýän eserlere hem uly orun berilýär. Şolaryň üsti hemişe täzeleri bilen ýetirilip durulýar. Bütindünýä saglyk gününiň «Halkyň Arkadagly zamanasy» ýylyndaky dabaralarynyň çäginde hem mekdebimiziň okuwçylary täze eserleriň birnäçesi bilen çykyş etdiler. Bu eserler ýörişe gatnaşyjylar tarapyndan gyzgyn garşylanyldy
Pursatdan peýdalanyp, ýurdumyzda milli medeniýetimizi ösdürmäge uly üns berilýändigini nygtamak isleýäris. Bu gün türkmenistanly medeniýet we sungat işgärleri öz zehinini, ukybyny dünýä çykarmaga giň mümkinçilikleri alýarlar. Medeni gymmatlyklarymyzyň birnäçesi, şol sanda türkmen dutary ÝUNESKO tarapyndan tutuş adamzadyň gymmatlygy hökmünde ykrar edildi. Hormatly Prezidentimiziň ýolbaşçylygynda bu gymmatlyklary munda beýläk hem dünýä ýaýmak boýunça işler alnyp barylýar. Bu belent tutumlar we netijeli başlangyçlar üçin döwlet Baştutanymyza tüýs ýürekden hoşallyk bildirýäris.
Dmitriý Lukiçýow,
Lebap welaýatynyň çagalar sungat mekdebiniň mugallymy.
