Saza baglanan ömür
Dutaryň mukamy dünýä ýaň salýar,
Owazyna älem – jahan diň salýar,
Arkadagly Gahryman Serdar bilen galkynýar,
Öňe, öňe, bedew batly Watanym!
Bu gün türkmen döwleti, türkmen milleti özüniň agzybirligini, jebisligini, ýeten belent derejelerini dünýä jar edip, Hormatly Prezidentimiziň sahawata beslenen ak ýolundan nurly ertelerine ynam bilen gadam basýar. Gahryman Arkadagymyzyň, Arkadagly Gahryman Serdarymyzyň pähim – paýhasa, tutuş halkymyzyň çuňňur bähbidine ýugrulan beýik syýasaty milletiň kalbyny nur bolup çoýýar, ykbalyny berkarar Watan bolup bagryna basýar, rysgal – bereket bolup , eşret bolup eçilýär. Bu eşretli zamanada milli medeniýetimize, sungatymyza uly üns berilip, giň mümkinçilikler döredilýär. Medeniýet – sungat işgärleri hem bu edilýän atalyk aladalaryna jogap edip, janyny gaýgyrman zähmet çekýärler.
Muňa mysal bolup , bahar paslynyň ajaýyp günleriniň birinde Lebap welaýat medeniýet müdiriliginiň gurnamagynda welaýatyň çäginde ýerleşýän çagalar sazçylyk we sungat mekdepleriniň orkestr toparlarynyň arasynda geçirilen bäsleşik bolup biler. Bu bäsleşige birnäçe mekdepler bilen bir hatarda Lebap welaýat çagalar sungat mekdebiniň halk saz gurallar topary hem işjeň we üstünlikli gatnaşyp, baýrakly birinji orna mynasyp boldy. Bu topara mekdepde 30 ýyldan gowrak zähmet çekýän tejribeli, ezber, zehinli, öz kärine wepaly mugallym Gülara Saparowa ýolbaşçylyk edýär. Mugallymyň ýaşlykdan saza bolan söýgüsi we onuň ýiti zehini, ony ilki sazçylyk mekdebinde, soňra Lebap welaýat ýörite sungat mekdebinde “Halk saz gurallar” bölüminiň “Akkordeon” saz guralynda halypa mugallym Baýram Dosmedowdan tälim almana , soňra okuwyny tamamlap bu sungata ömrüni bagş etmek we çagalara tälim bermek diýen pikire getirýär. Şeýlelik bilen Gülara Saparowa eýýam 30 ýyllyk mugallymçylyk tejribesiniň dowamynda ençeme ýaş zehinlere sungatyň inçe tilsimlerini öwredip gelýär. Mugallym özüniň esasy hünär sapaklaryndan daşary akkordeonçylar toparyny döredip, ýurdumyzda giňden bellenilýän baýramçylyk konsertleriniň bezegi bolup çykyş edip gelýär. 2013 – nji ýylda Gahryman Arkadagymyzyň Lebap welaýatyna iş saparynyň çäklerinde gurnalan konsert çykyşynda akkordeonçylar topary çykyş edip, Milli Liderimiziň Şa serpaýyna, täze akkordeon saz gurallaryny sowgat almak bagtyna mynasyp bolýar. Bu hem toparyň döredijilik durmuşynda ýatdan çykmajak bagtly purstalaryň biri bolýar.
Ýylyň – ýylyna çagalar sazçylyk we sungat mekdepleriniň döredijilik toparlarynyň arasynda geçirilýän bäsleşiklerde mugallym akkordeonçylar topary we halk saz gurallar orkestri bilen baýrakly orunlara mynasyp bolup gelýär. Orkestrleriň arasynda geçirilen şu ýylky bäsleşigine hem mugallymyň saýlap alan saz eserleri özüniň çylşyrymlylygy we özboluşlylygy bilen tapawutlanýar. Orkestr ilkinji bolup kompozitor A.Agajykowyň halk sazyna döreden “Durdy bagşy” atly ajaýyp eserini, ýekelikde dutar saz guralynda mekdebiň ýaş zehinli okuwçysy Kerimberdi Mähemmetgulyýewiň çalmagynda ýerine ýetirdiler. Oňa halypalyk eden ýaş zehinli mugallym O.Haýdarowa dutaryň orkestr bilen juda sazlaşykly ýaňlanyp, okuwçynyň ýürekden ýerine ýetirmegini gazandy. Soňra topar kompozitor G.Rzaýewiň Konsertino eserini , ýekelikde iki saz gurallar bilen bilelikde üstünlikli ýerine ýetirip, diňleýjileri orkestriň saz gurallarynyň üýtgeşik owazlanmasy bilen haýrana goýdy. Ýekelikde halypa mugallym N.Joraýewiň şägirdi, “Plektrli dutar” hünäriniň 5-nji synp okuwçysy R.Berdiýew we zehinli ýaş mugallym F.Nazarowyň şägirdi, “Ksilofon” hünäriniň 4 – nji synp okuwçysy R.Hudaýberdiýew dagylar özüniň üýtgeşik duetiniň sazlaşygy bilen bu eseriň owadanlygyny has – da artdyrdy. Eseriň çylşyrymlylygy we barmaklaryň ýüwrükliliginiň ussatlyk derejesini talap edýändigi okuwçylar R.Berdiýewiň, R.Hudaýberdiýewiň we olaryň halypa mugallymlarynyň öňünde juda aňsat bolmadyk meseläni ýüze çykarsa – da , olar batyrgaýlyk bilen ony ýeňmegiň hötdesinden geldiler. Toparyň üçünji eseri kompozitor J.Reýimowanyň D.Annamyradowyň sözlerine döreden “Şöhrat saňa, Türkmenistan!” atly dabaraly aýdym bolup, orkestriň çykyşynyň buýsançly we tolgundyryjy jemlenmesi bolup ýaňlandy. Aýdymy mahmal sesli ýaş zehinli okuwçylar A.Altybaýewa, S.Juraýewa, Ş.Baltaýew, K. Mähemmetgulyýew ussatlyk bilen ýerine ýetirip, bu toparyň baýrakly orun aljakdygyna hiç hili şübhe goýmadylar.
Şeýle ajaýyp üstünlikleriniň höwrüniň köp bolmagyny mugallym Gülara Saparowa we onuň zehinli şägirtlerine arzuwlaýarys.
Surata düşüren Serdar Jumakulyýew.
Lebap welaýat Çagalar sungat mekdebiniň “Sazyň taryhy we nazaryýeti” bölüminiň
mugallymy Zulfiýa Hojanazarowa