Türkmenabadyň pamyk egriji fabriginde şu ýylyň ýanwar aýynda 800 tonnadan gowrak önüm öndürildi. Bu geçen ýylyň degişli döwri bilen deňeşdirilende, 104% ösüş gazanylandygyny aňladýar.

Ozal hem habar berşimiz ýaly, kärhananyň önümleriniň aglaba bölegi daşary ýurtlara eksporta iberilýär. Ony Beýik Britaniýanyň, Russiýanyň, Türkiýäniň kompaniýalary satyn alýarlar. Bir aýyň dowamynda eksportdan alnan girdeji 8 million manatdan geçdi.

Türkmenistanda ýetişdirilen pagta hasylyny dolulygyna senagat taýdan gaýtadan işlemäge ugur alyndy. Häzir diňe Lebap welaýatynda pagta arassalaýjy kärhanalaryň 11-si hereket edýär. Olarda çigidinden arassalanandan soň çykýan pamygyň bir bölegi bar bolan 4 sany pamyk egriji fabriklerde işlenilýär. Olarda ýokary tehnologiýaly enjamlaryň oturdylandygy bolsa, önümiň hiliniň ýokary bolmagyny şertlendirýär. Netijede fabrikleriň çykarýan dürli belgili ýüplükleri içerki we daşarky bazarlarda uly islegden peýdalanýarlar.