Mugallymçylyk institutynyň talyby halkara sammite gatnaşýar

Seýitnazar Seýdi adyndaky Türkmen döwlet mugallymçylyk institutynyň V ýyl talyby Begenç Salamatow Gazagystan Respublikasynyň Astana şäherinde geçirilýän «Sebitleýin ekologiýa sammitine (RES-2026)» gatnaşýar. Sammit 2026-njy ýylyň 21 — 26-njy apreli aralygynda Birleşen Milletler Guramasynyň Çagalar gaznasy — UNICEF tarapyndan guralýar.
Halkara çärä ylmy we jemgyýetçilik guramalarynyň 1500-e golaý wekili gatnaşýar. Sammitiň meýilnamasynyň çäklerinde 24-nji aprelde «Geljekki ekoulgam: çagalar we ýaşlar durnukly ösüşiň arhitektorlary hökmünde» atly ýörite ýaşlar amaly-usuly maslahaty hem geçirilýär.
Sebitleýin sammit Merkezi Aziýadan 100-den gowrak ýaş ekologlary bir ýere jemleýär. Onda ýaşlar suw serişdelerini netijeli ulanmak, energiýa, «ýaşyl» tehnologiýalar, biodürlüligi gorap saklamak we durnukly ykdysadyýete geçmek boýunça öz tekliplerini hödürleýärler.