Moskwanyň binalary türkmen baýdagynyň reňkleri bilen bezeldi
Türkmenistanyň Garaşsyzlygynyň 33 ýyllygy Moskwa şäherinde aýratyn dabara bilen bellenildi. Russiýanyň paýtagtynyň Täze Arbat köçesindäki köpgatly binalar türkmen milli baýdagynyň ýaşyl, gyzyl we ak reňkleri bilen bezeldi. Bu barada Türkmenistanyň Russiýa Federasiýasyndaky ilçihanasy habar berýär.
Moskwanyň meriýasynyň bu karary dostluk, hoşniýetli goňşuçylyk we özara düşünişmek ýaly ýörelgeleriň aýdyň nyşany bolup durýar. Şeýle hem, ol Türkmenistanyň we Russiýa Federasiýasynyň arasyndaky strategik hyzmatdaşlygyň pugtalandyrylmagyna bolan ygrarlylygy görkezýär. Täze Arbat köçesindäki binalaryň baýdak reňkleri bilen şöhlelenmegi, Moskwada Türkmenistanyň Garaşsyzlyk gününiň hormatyna bildirilýän aýratyn üns hökmünde kabul edilýär.
Bu çäre, Türkmenistanyň we Russiýanyň arasyndaky dost-doganlyk gatnaşyklarynyň hemmetaraplaýyn ösdürilmeginiň subutnamasy bolup, iki ýurduň arasyndaky hyzmatdaşlygyň strategik derejesiniň we hoşniýetli gatnaşyklarynyň ýokary derejede saklanýandygyny görkezýär.
