Milli rekordyň eýesi ― dünýäniň çempiony
Mekan Nurgeldiýew Türkmenabat şäherindäki ýöriteleşdirilen 41-nji orta
mekdebiň 5-nji synpynda okaýar. Ol «Kämil bilim» okuw merkezinde 2022-nji ýylda mekdep okuwçylarynyň arasynda mental arifmetika boýunça yglan edilen döwlet bäsleşiginiň «Flaş Anzan Marafony» görnüşinde 7 ýaşlylaryň arasynda birinji orna mynasyp boldy. Geçen ýyl bolsa ol ýene şu bäsleşikde ozalky üstünligini 8 ýaşlylaryň arasynda hem gaýtalady. Soňky iki ýylda has kämilleşen Mekan şu ýyl bu bäsleşikde «Flaş Anzan Marafony» görnüşi boýunça bassyr üçünji gezek (2024-nji ýylda 9 ýaşlylaryň arasynda) ýurdumyzyň çempiony bolup, muny başaran ýeke-täk okuwçy hökmünde milli rekordyň eýesi boldy.Ýakynda bolsa ol milli üstünlikleriniň üstüni olimpiadanyň çempionlygy bilen ýetirdi. Has takygy, Mekan Birleşen Arap Emirlikleriniň Dubaý şäherinde geçirilen «MEMORIAD — 2024» Bütindünýä zehin sportlary olimpiadasynda altyn medala mynasyp bolup, dünýäniň çar künjünden ýygnanan zehinleri we olaryň halypalaryny haýrana goýdy. Bu olimpiadada Mekana ýene-de «Flaş Anzan Marafony» derejesi üstünlik getirdi. Ol bu derejede 13 ýaşdan kiçi çagalaryň arasynda 1825,13 sekundyň dowamynda 43988,89 utuk toplap, dünýäniň täze çempiony bolmagy başardy.
