Medeniýet we sungat işgärleri sylaglanyldy
Şu gün Lebap welaýat Medeniýet müdirliginde Medeniýet we sungat işgärleriniň hem-de Magtymguly Pyragynyň şygryýet güni mynasybetli baýramçylyk dabarasy geçirildi. Welaýat häkimligi tarapyndan geçirilen dabarada öňdebaryjy medeniýet we sungat işgärlerine baýramçylyk sowgatlary hem gowşuryldy.
Sylaglanyş dabarasyna welaýat häkiminiň orunbasary Oguljennet Berdiliýewa hem gatnaşdy. Ol bu ýere ýygnan medeniýet, sungat we döredijilik işgärlerini hünär baýramy bilen gutlady. Soňra dabara gatnaşyjylara welaýat häkimligi tarapyndan taýýarlanylan gymmat bahaly sowgatlar gowşuryldy. Sylaglananlaryň arasynda welaýat «Türkmen gündogary» gazetiniň redaksiýasynyň, welaýat Medeniýet müdirliginiň, Halaç, Kerki we Saýat etrabynyň Sakar şäher medeniýet merkezleriniň, welaýat Taryhy we ülkäni öwreniş muzeýiniň, teleradio studiýasynyň, welaýat ýörite sungat, çagalar sungat we çagalar çeperçilik mekdepleriniň, Seýitnazar Seýdi adyndaky döwlet sazly drama teatrynyň we beýleki sungat ojaklarynyň wekilleri bar. Meşhur aýdymçylar Arslan Jumaýew, Izzet Altyýew dagylar bolsa gatnaşyjylary şowhunly aýdymlar biln gutladylar.
