Saglygy goraýyş ulgamy jemgyýetiň durnukly ösüşini üpjün edýän möhüm pudaklaryň biridir. Häzirki wagtda ýurdumyzda lukmançylyk hyzmatlarynyň hili döwlet derejesinde aýratyn gözegçilikde saklanylýar. Munuň özi lukmanlaryň jogapkärçiligini has-da artdyrýar we olaryň hünär taýdan kämilleşmegine täze mümkinçilikleri döredýär.
Lebap welaýat onkologiýa hassahanasynda alnyp barylýan işler hassalara ýokary derejeli lukmançylyk kömegini bermäge gönükdirilendir. Irki anyklama, ylmy taýdan esaslandyrylan bejeriş usullary, şeýle hem halkara tejribä laýyklykda ornaşdyrylan täze tehnologiýalar hassalaryň saglygyny goramakda möhüm ähmiýete eýedir. Şeýle şertlerde lukmanlaryň hünär ussatlygy bilen bir hatarda olaryň ynsanperwerlik ýörelgelerine berk eýermegi aýratyn ähmiýetlidir.
Lukman üçin her bir hassa diňe bir kliniki ýagdaý däl, eýsem adam ykbaly bolup durýar. Şonuň üçin hem hassalara mähirli çemeleşmek, olara ruhy goldaw bermek bejeriş işiniň möhüm bölegidir. Döwletimiziň saglygy goraýyş ulgamyna döredýän giň mümkinçilikleri lukmanlaryň bu belent wezipesini üstünlikli ýerine ýetirmegine şert döredýär.
Açylgül JEPBAROWA,
Lebap welaýat onkologiýa hassahanasynyň lukmany.
